Shveysariya va Germaniyaning O‘zbekistondagi yangi elchilari tayinlandi
Tashqi ishlar vaziri Baxtiyor Saidov Shveysariya va Germaniyaning mamlakatdagi yangi elchilari Simon Giger hamda Mattias Follertdan ishonch yorliqlari nusxalarini qabul qildi.
O‘zbekiston tashqi ishlar vaziri Baxtiyor Saidov Shveysariyaning O‘zbekistondagi yangi elchisi Simon Giger hamda Germaniyaning yangi favqulodda va muxtor elchisi Mattias Follertdan ishonch yorliqlari nusxalarini qabul qildi.
Simon Giger bilan uchrashuvda O‘zbekiston va Shveysariya o‘rtasidagi siyosiy muloqotni faollashtirish, savdo-iqtisodiy va investitsiyaviy hamkorlikni kengaytirish, sanoat kooperatsiyasini rivojlantirish hamda yangi qo‘shma loyihalarni ilgari surish masalalari muhokama qilindi.
Giger ushbu lavozimda 2021-yildan beri O‘zbekistonda faoliyat yuritgan Konstantin Obolenskiyning o‘rnini egalladi. Obolenskiy diplomatik missiyasini 2026-yil iyun oyida yakunlagan.
Germaniyaning yangi elchisi Mattias Follert bilan uchrashuvda esa ikki tomonlama kun tartibidagi dolzarb masalalar muhokama qilindi. Tomonlar oliy darajada erishilgan kelishuvlarni o‘z vaqtida va sifatli amalga oshirish muhimligini ta’kidladi.
Baxtiyor Saidov Germaniyani O‘zbekistonning Yevropadagi ishonchli va vaqt sinovidan o‘tgan hamkorlaridan biri sifatida baholadi. Uning qayd etishicha, so‘nggi yillarda yuqori darajadagi tashriflar va muntazam siyosiy muloqotlar tufayli ikki mamlakat munosabatlari izchil rivojlanmoqda.
Germaniyaning O‘zbekistondagi sobiq favqulodda va muxtor elchisi Manfred Huterer mamlakatdagi diplomatik missiyasini iyul oyida yakunlagandi.
