Ehtiyojmand oilalarga “svet” va gaz uchun 6 oyda 92,1 mlrd so‘m kompensatsiya to‘landi
Bunda bazaviy me’yor doirasidagi tarif bilan undan oshgan qism uchun belgilangan narx o‘rtasidagi farq qoplab beriladi.
2026-yilning yanvar-iyun oylarida O‘zbekistonda 562 918 ta ehtiyojmand oilaga elektr energiyasi va tabiiy gaz uchun jami 92,1 mlrd so‘m kompensatsiya to‘lab berildi. Bu haqda Ijtimoiy himoya milliy agentligi ma’lum qildi.
Kompensatsiya Prezidentning 2025-yil 2-apreldagi PQ-134-son qarori asosida bazaviy me’yordan ortiq foydalanilgan elektr energiyasi va tabiiy gaz uchun belgilangan tartibda ajratiladi. Bunda bazaviy me’yor doirasidagi tarif bilan undan oshgan qism uchun belgilangan narx o‘rtasidagi farq qoplab beriladi.
Hisobot davrida elektr energiyasi uchun 51 mlrd 427,8 mln so‘m, tabiiy gaz uchun esa 40 mlrd 702,3 mln so‘m kompensatsiya to‘langan.
Kompensatsiya olish tartibi bo‘yicha batafsil ma’lumotni mahalladagi ijtimoiy xodim, tumandagi “Inson” ijtimoiy xizmatlar markazi yoki Ijtimoiy himoya milliy agentligining 1140 qisqa raqamli Call-markazi orqali olish mumkin.
