Fermer xo‘jaliklarining buxgalteriya hisobini yuritish tartibi belgilandi
Unga ko‘ra, “Soliq-servis” AJning hududiy bo‘limlari ayrim fermer xo‘jaliklariga buxgalteriya va hisobot xizmatlarini bepul ko‘rsatadi.
Fermer xo‘jaliklarining buxgalteriya hisobini yuritish tartibi to‘g‘risidagi nizomni davlat ro‘yxatidan o‘tkazildi. Hujjat 2026-yil 11-avgust kuni 3921-raqam bilan ro‘yxatga olingan.
Nizomga ko‘ra, “Soliq-servis” AJning hududiy bo‘limlari fermer xo‘jaliklariga buxgalteriya hisobi va hisobotlarini yuritish bo‘yicha xizmatlar ko‘rsatadi.
Xizmatlar quyidagi fermer xo‘jaliklariga bepul taqdim etiladi:
— paxta va g‘alla yetishtiruvchi fermer xo‘jaliklariga buxgalteriya hisobi va hisobotlarini yuritish;
— yangi tashkil etilgan fermer xo‘jaliklariga ularning xohishiga ko‘ra dastlabki 6 oy davomida soliq va moliyaviy hisobotlarni yuborish;
— rahbari yoshlar bo‘lgan yangi tashkil etilgan fermer xo‘jaliklariga 2 yil davomida tegishli xizmatlarni ko‘rsatish.
Shuningdek, “Soliq-servis” AJ hududiy bo‘limlari fermer xo‘jaliklarini buxgalteriya hisobi va hisobotini yuritish tizimiga qabul qilish, buxgalteriya hisobini tashkil etish va yuritish bilan shug‘ullanadi.
Bundan tashqari, fermer xo‘jaligi xodimlarining ish haqi, soliqlari va boshqa to‘lovlarini hisoblash, soliqlar va yig‘imlar hisobini yuritish, soliq, moliyaviy hamda statistik hisobotlarni tayyorlash va inventarizatsiya jarayonlarida ishtirok etish ham mazkur xizmatlar qatoriga kiradi.
