Qarzi bo‘lmagan 3600 ta xonadonga soliq qarzdorligi hisoblandimi?
Toshkentda ayrim xonadonlar uchun yer solig‘i qayta hisoblanganiga izoh berildi.
Ijtimoiy tarmoqlarda Toshkentdagi ayrim xonadonlarga avval mavjud bo‘lmagan soliq qarzdorligi hisoblangani haqida xabarlar tarqaldi. Holat Soliq qo‘mitasi rasmiy munosabat bildirdi.
Qayd etilishicha, ko‘chmas mulk obyektlariga mol-mulk va yer soliqlari kadastr idoralari ma’lumotlari asosida hisoblanadi. Toshkent shahar hokimining 2023-yil 3-martdagi qarori bilan zona chegaralari qayta tasdiqlangan. Shundan so‘ng Yuksalish ko‘chasi hududi 5-zonadan 4-zonaga o‘tkazilib, tegishli ma’lumotlar soliq organlariga taqdim etilgan.
Shu asosda ko‘chmas mulk obyektlarining yer solig‘i 2023-yildan 4-zona uchun belgilangan stavkalar bo‘yicha qayta hisob-kitob qilingan.
Ma’lum qilinishicha, Yangihayot tumanining Xushnud mahallasidagi jami 144 ta ko‘chmas mulk obyektiga soliqlar qayta hisoblangan.
Shuningdek, 937-sonli Qonun ijrosini ta’minlash doirasidagi xatlov natijalariga ko‘ra, soliq organlariga har oyda o‘rtacha 50 mingga yaqin obyekt bo‘yicha ma’lumot kelib tushmoqda. Shu sababli qayta hisob-kitoblar amalga oshirilishi tabiiy jarayon ekani ta’kidlangan.
Rasmiy munosabatda qayta hisob-kitoblar amaldagi soliq qonunchiligi talablari asosida amalga oshirilgani qayd etilgan. To‘lanadigan soliqlar mahalliy budjetlarga yo‘naltirilib, aholini ijtimoiy himoya qilish, infratuzilmani rivojlantirish va hududlarni obodonlashtirishga xizmat qilishi bildirilgan.
