Qashqadaryoda haydovchi YPX mashinasini urib, qochishga urindi
Haydovchi ikki chorrahada YPX xodimlarining to‘xtash ishorasiga bo‘ysunmay, harakatini davom ettirgan.
Qashqadaryo viloyatining Chiroqchi tumanida YPX xodimlarining qonuniy to‘xtash ishorasiga bo‘ysunmagan Nexia-2 haydovchisi patrul avtomashinasini urib, voqea joyidan qochishga urindi. Bu haqda viloyat IIB matbuot xizmati xabar berdi.
Ma’lum qilinishicha, tungi xizmatga jalb qilingan YPX inspektorlari hujjatlarni tekshirish maqsadida Nexia-2 avtomashinasini to‘xtatgan. Biroq haydovchi to‘xtash ishorasiga bo‘ysunmay, harakatini davom ettirgan.
Keyingi chorrahada xizmat olib borayotgan YPX xodimi ham haydovchiga bir necha bor to‘xtash ishorasini bergan. Shunga qaramay, u ichki ishlar organlari xodimlarining qonuniy talablarini bajarmagan.
Patrul ekipaji haydovchining harakatini qarama-qarshi yo‘nalishda harakatlangan xizmat avtomashinasi yordamida cheklashga uringan. Biroq Nexia-2 haydovchisi patrul avtomashinasini urib, yana voqea joyidan qochishga harakat qilgan.
Ko‘rilgan tezkor chora-tadbirlar natijasida haydovchining shaxsi aniqlanib, u ushlangan.
Haydovchi dastlabki izohida hujjatlari yo‘qligi sababli YPX xodimlaridan qo‘rqib, to‘xtamasdan harakatlanganini bildirgan.
Hozirda holat yuzasidan Chiroqchi tumani IIB tomonidan tergovga qadar surishtiruv ishlari olib borilmoqda.
Eslatib o‘tamiz, avvalroq Farg‘ona viloyatida “Spark” boshqargan mast haydovchi YPX xodimining qonuniy to‘xtash talabiga bo‘ysunmasdan xodimni urib yuborgani va xodim olgan jarohatlari oqibatida vafot etgani haqida xabar berilgan edi.
