Surxondaryoda elektr ta’minoti to‘liq tiklandi
Blekautga Markaziy Osiyo yagona energetika tizimida yuzaga kelgan avariyali holat sabab bo‘lgandi.
14-avgust kuni soat 14:38 da Markaziy Osiyo yagona energetika tizimida avariya yuzaga kelishi oqibatida O‘zbekiston va qo‘shni davlatlarning ayrim hududlarida elektr ta’minotida uzilishlar kuzatildi.
Energetika vazirligining ma’lum qilishicha, “O‘zbekiston milliy elektr tarmoqlari” kompaniyasi ma’lumotiga ko‘ra, elektr tarmoqlari va podstansiyalaridagi avariyaga qarshi avtomatika tizimlari o‘z vaqtida va to‘g‘ri ishlashi natijasida avariyaning O‘zbekiston energotizimida kengayib ketishining oldi olingan.
Shuningdek, qisqa vaqt ichida yo‘qolgan quvvatni qoplashda energiya saqlash tizimlaridagi (BESS) zaxira energiyaning tarmoqqa tezkor uzatilishi muhim rol o‘ynagan. Bu tizimlar zarur paytda energiyani juda qisqa vaqt ichida tarmoqqa yetkazib, quvvat muvozanatini tiklash va elektr chastotasining keskin pasayishining oldini olishga xizmat qilgan.
Qayd etilishicha, Surxondaryo viloyatining elektr ta’minoti asosan ikkita 500 kV kuchlanishli elektr uzatish tarmog‘i orqali ta’minlanadi. Ulardan biri qo‘shni davlat hududidan, ikkinchisi Qashqadaryo viloyati hududidan elektr energiyasini yetkazib beradi.
Avariya vaqtida ushbu tarmoqlardan birida rejali ta’mirlash ishlari olib borilayotgan bo‘lgan. Shu sababli qo‘shni davlatdan elektr energiyasi keladigan tarmoqdagi uzilish viloyat ta’minotini qisqa muddatda to‘liq tiklash imkoniyatini cheklagan.
Tezkor choralar natijasida rejali ta’mirlashdagi 500 kVli elektr uzatish tarmog‘i xavfsizlik talablariga muvofiq ishga tayyor holatga keltirilib, qayta ishga tushirilgan. Shundan so‘ng Surxondaryoda elektr ta’minoti bosqichma-bosqich to‘liq tiklangan.
