Isroilning Livan janubiga bergan zarbalaridan 11 kishi halok bo‘ldi
Halok bo‘lganlar orasida uch nafar bola bor, yana 19 kishi jarohatlangan.
Isroilning Livan janubiga bergan havo zarbalari oqibatida kamida 11 kishi halok bo‘ldi, 19 kishi jarohatlandi. Halok bo‘lganlar orasida uch nafar bola ham bor. Bu haqda Al Jazeera xabar berdi.
Ma'lum qilinichicha, bu iyun oyida Isroil va Hizbulloh o‘rtasidagi jangovar harakatlarni sezilarli darajada kamaytirgan kelishuvlardan keyingi eng qonli hujum bo‘ldi. Hujumlar 15 avgust kuni tongda Nabatiya viloyatidagi Ansar va Deir az-Zahrani hududlariga uyushtirilgan. Ansardagi zarba oqibatida yetti kishi, jumladan uch nafar bola halok bo‘lgan, ikki kishi yaralangan. Deir az-Zahraniga berilgan zarbada esa to‘rt kishi halok bo‘lib, 17 kishi jarohatlangan.
Isroil harbiylari zarbalar Nabatiya va Ansar hududlaridagi Hizbulloh infratuzilmasiga qarshi amalga oshirilganini bildirdi. Isroil tomoni hujum Hizbullohning Ali al-Taher tizmasi hududida Isroil askarlariga qarshi harakatiga javoban uyushtirilganini ma’lum qilgan. Keyinchalik Isroil Bosh vaziri idorasi mazkur hujum oqibatida uch nafar isroillik askar og‘ir yaralanganini bildirgan.
Hizbulloh Isroil hujumlariga “munosib javob” berilishini ma’lum qildi. Guruh Livan hukumatini AQSH vositachiligidagi muzokaralarga tayanmaslikka chaqirib, Vashington Isroil manfaatlarini Livan suverenitetidan ustun qo‘yayotganini ta’kidladi.
Livan bosh vaziri Navof Salam Isroil hujumlarini qoralab, vaziyatning keskinlashuvi “o‘ta xavfli” ekanini aytdi. Uning so‘zlariga ko‘ra, Livan hududidagi har qanday harbiy infratuzilma bilan shug‘ullanish faqat Livan davlatining vakolatiga kiradi.
Livan prezidenti Jozef Aun ham hujumlarni qoralab, ular janubdagi barqarorlikni ta’minlashga qaratilgan kelishuvlarni buzayotganini bildirdi.
Isroil va Livan o‘rtasidagi iyun oyidagi kelishuv Hizbullohni qurolsizlantirish, Isroil kuchlarini Livan hududidan bosqichma-bosqich olib chiqish hamda Livan armiyasini mamlakat janubiga joylashtirishni nazarda tutadi. Biroq kelishuvga qaramay, Livan janubida Isroil hujumlari davom etmoqda.
