Rossiyada migrantlar soniga cheklov joriy etish taklif qilindi
Shuningdek, migrantlarning ishlamaydigan yoki o‘qimaydigan oila a’zolari uchun kirish va yashash cheklovlarini joriy etish masalasi ham ko'rib chiqilmoqda.
Rossiyaning Liberal-demokratik partiyasi (LDPR) mamlakatdagi xorijiy fuqarolar soniga cheklovlar joriy etishni taklif qildi.
Davlat Dumasining Xavfsizlik va korrupsiyaga qarshi kurash qo‘mitasi raisining birinchi o‘rinbosari, LDPR fraksiyasi rahbariyatidagi deputat Andrey Lugovoyning ta’kidlashicha, Rossiyada ishlash yoki o‘qish uchun asosga ega bo‘lmagan migrantlarning oila a’zolarining mamlakatga kirishi va yashashiga ruxsat berilmasligi kerak.
Uning so‘zlariga ko‘ra, Rossiyaga ishlash uchun kelgan xorijiy fuqarolar mehnat qilishi, o‘qish uchun kelganlar esa ta’lim olishi kerak.
Lugovoy Rossiyada qolayotgan migrantlar sonini bosqichma-bosqich kamaytirishni taklif qildi. Uning rejasiga ko‘ra:
2027-yil oxirigacha — 5 million nafargacha;
2028-yil oxirigacha — 4 million nafargacha;
2030-yilga kelib — 3 million nafargacha xorijiy fuqaro qolishi kerak.
Deputat, shuningdek, noqonuniy yashash, qonunbuzarlik yoki mamlakatda qolish uchun asoslarning tugashi deportatsiyaga sabab bo‘lishi kerakligini ta’kidlagan.
Bundan tashqari, qurilish, savdo, transport, qishloq xo‘jaligi va xorijiy ishchi kuchi ulushi yuqori bo‘lgan boshqa sohalarda migrantlar uchun ruxsat etilgan ishchi kuchi ulushini bosqichma-bosqich kamaytirish va 2030-yilga borib 10 foizgacha tushirish taklif qilingan.
Lugovoyning fikricha, ish beruvchi xorijiy ishchi kuchidan foydalanish iqtisodiyot uchun zarur ekanini asoslab berishi kerak.
