Isroil armiyasi “Hizbulloh”ning yuqori martabali qo‘mondoni yo‘q qilinganini ma'lum qildi
IDF qo‘mondonning Isroil harbiylariga qarshi hujumlarni, jumladan, dron hujumlarini tayyorlashda ishtirok etganini bildirdi.
Isroil mudofaa armiyasi (IDF) “Hizbulloh”ning “Bader” otryadi katta qo‘mondoni Abu Hasan Alaa yo‘q qilinganini ma’lum qildi. Bu haqda Point.md xabar berdi.
IDF bayonotiga ko‘ra, zarba Livan janubidagi “xavfsizlik hududi”da Isroil harbiylariga qarshi “Hizbulloh” harakatlariga javoban berilgan.
Isroil harbiylari Abu Hasan Alaa IDF askarlariga qarshi hujumlarni, jumladan, ular tomon dronlar uchirilishini tayyorlashda ishtirok etganini bildirdi.
Isroilning Livandagi “Hizbulloh” obyektlari va jangarilariga qarshi zarbalari mart oyining boshidan beri davom etmoqda.
Ma’lumot uchun, 26-iyun kuni Bayrut va Tel-Aviv Vashington ko‘magida IDF'ning Livandan chiqarilishi va “Hizbulloh”ni qurolsizlantirishni nazarda tutuvchi tinchlik kelishuvini imzolagan. Biroq shunga qaramay, tomonlar o‘rtasida o‘zaro zarbalar davom etmoqda.
