Sudya Aziza Mirzayeva majlisga ketayotganida halokatga uchradimi?
Oliy sud Tomdi tuman sudi raisi vafoti yuzasidan rasmiy munosabat bildirdi.
15-avgust kuni Jinoyat ishlari bo‘yicha Tomdi tuman sudi raisi Aziza Mirzayeva yo‘l-transport hodisasida halok bo‘lgandi. Huquq faoli Abdurahmon Tashanov sudya majlisga ketayotganida halokatga uchragani haqida yozgan edi.
Unga ko‘ra, 15-avgust — dam olish kuniga qaramay, Oliy sud rahbariyati tomonidan sudlov tizimi uchun majlis o‘tkazilgan va shahar hamda tuman sudlari rahbarlariga o‘z kabinetlarida videokonferensaloqa orqali unda ishtirok etish topshirilgan.
Oliy sud mazkur xabarlarga rasmiy munosabat bildirdi.
Ma’lum qilinishicha, ijtimoiy tarmoqlar va ayrim axborot manbalarida tarqalgan Aziza Mirzayeva dam olish kuni Oliy sud rahbariyati tomonidan o‘tkazilishi belgilangan majlisda ishtirok etish uchun Tomdi tumaniga yo‘l olgani haqidagi ma’lumotlar haqiqatga to‘g‘ri kelmaydi.
Rasmiy munosabatga ko‘ra, 2026-yil 15-avgust kuni Oliy sud tomonidan hech qanday majlis belgilanmagan va o‘tkazilmagan. Shuningdek, shahar va tuman sudlari raislarining dam olish kuni xizmat joyiga kelishini talab qiluvchi hech qanday topshiriq berilmagan.
Oliy sud Aziza Mirzayevaning bevaqt vafoti munosabati bilan uning oila a’zolari, farzandlari, yaqinlari va hamkasblariga chuqur hamdardlik bildirib, hodisaning kelib chiqish sabablari va boshqa holatlariga huquqiy baho vakolatli organlar tomonidan qonunchilikda belgilangan tartibda berilishini ma’lum qildi.
Shuningdek, tekshiruv yakuniga yetmasdan marhumaning qayerga va qanday maqsadda yo‘l olgani yoki hodisa sabablari haqidagi taxminlarni tasdiqlangan fakt sifatida tarqatish o‘rinsiz ekani ta’kidlandi.
Oliy sud OAV, blogerlar va ijtimoiy tarmoq foydalanuvchilarini marhumaning xotirasi hamda uning yaqinlari qayg‘usiga hurmat bilan munosabatda bo‘lishga, tekshirilmagan ma’lumot va asossiz taxminlarni tarqatmaslikka chaqirdi.
