Uchtepadagi yong‘inda halok bo‘lgan FVV ofitseri Samarqandda dafn etildi
Dafn marosimida FVV rahbariyati va shaxsiy tarkibi, marhumning yaqinlari hamda keng jamoatchilik vakillari ishtirok etdi.
15-avgust kuni Uchtepa tumanida sodir bo‘lgan yong‘inda xizmat vazifasini bajarish chog‘ida halok bo‘lgan Favqulodda vaziyatlar vazirligi (FVV) Maxsus qutqaruv batalyoni otryad komandirining o‘rinbosari – guruh komandiri, kapitan Boburmirzo Pardayev Samarqand viloyatining Kattaqo‘rg‘on shahrida dafn etildi.
Dafn marosimida FVV rahbariyati va shaxsiy tarkibi, marhumning yaqinlari hamda keng jamoatchilik vakillari ishtirok etdi.
Marhum ofitser harbiy an’anaga muvofiq, harbiy sharaf bilan so‘nggi manziliga kuzatildi.
Kapitan Boburmirzo Pardayev el-yurt osoyishtaligini ta’minlash va insonlar hayotini asrash yo‘lida xizmat burchini bajarish chog‘ida halok bo‘ldi.
Marhumning jasorati va Vatanga sadoqati hamda uning qutqaruvchilik faoliyati hamkasblari va yaqinlari xotirasida saqlanib qoladi.
Eslatib o‘tamiz, kapitan shaxsan 7 kishini yonayotgan uydan olib chiqqan. Biroq yong‘inni bartaraf etish vaqtida tom qismi to‘satdan qulab tushgan va qutqaruvchi halok bo‘lgan.
