Учтепадаги ёнғинда ФВВ ходими 7 кишининг ҳаётини қутқариб, ўзи ҳалок бўлди
Ёнғин 15 август куни “Қуйи Дархон” МФЙ ҳудудидаги хонадонлардан бирида содир бўлган.
Тошкентнинг Учтепа туманида содир бўлган ёнғинда ФВВ Махсус қутқарув баталёни гуруҳ командири, капитан Бобурмирзо Пардаев ёнаётган уйдан 7 кишини олиб чиқиб, уларнинг ҳаётини сақлаб қолди. Бироқ қутқарув ишлари вақтида у ҳалок бўлди.
Ёнғин 15 август куни соат 03:41 да Учтепа тумани “Қуйи Дархон” МФЙ ҳудудидаги хонадонлардан бирида содир бўлган. Бу ҳақда “112” тизими орқали Тошкент шаҳар Фавқулодда вазиятлар бошқармасига хабар келиб тушган.
Қутқарувчилар воқеа жойига етиб келиб, ёнғинни ўчириш билан бирга, уйда бўлган аҳолини хавфсиз ҳудудга олиб чиқишни бошлаган.
Капитан Бобурмирзо Пардаев ҳам қутқарув ишларида фаол қатнашиб, шахсан 7 кишини ёнаётган уйдан олиб чиққан. Бироқ ёнғинни бартараф этиш вақтида том қисми тўсатдан қулаб тушган ва қутқарувчи ҳалок бўлган.
Фавқулодда вазиятлар вазирлиги раҳбарияти ва шахсий таркиби марҳум қутқарувчининг оила аъзолари ва яқинларига ҳамдардлик билдирган.
