Meta bolalarga zarar yetkazganlikda ayblanib, jarimaga tortilishi mumkin
AQShda kompaniyaga qarshi bolalar va o‘smirlarni ijtimoiy tarmoqlarda uzoqroq vaqt ushlab turadigan funksiyalardan foydalangani haqidagi da’volar bo‘yicha sud jarayoni boshlandi.
AQShda Meta kompaniyasiga qarshi bolalar va o‘smirlarga zarar yetkazgani haqidagi da’volar bo‘yicha sud jarayoni boshlandi. Bu haqda Point.md xabar berdi.
Kaliforniya, Kolorado, Kentukki va Nyu-Jersi shtatlari Meta’ni Facebook va Instagram’da bolalar hamda o‘smirlarni platformalarda imkon qadar uzoqroq ushlab turadigan funksiyalardan ataylab foydalanganlikda ayblamoqda.
Da’vogarlar, shuningdek, kompaniya 13 yoshdan kichik bolalarning ota-onalari roziligisiz ma’lumotlarini to‘plaganini ta’kidlamoqda. Meta esa barcha ayblovlarni rad etmoqda.
Kompaniyaning o‘z hisob-kitoblariga ko‘ra, ish bo‘yicha nazariy jihatdan 1,4 trillion dollargacha jarima qo‘llanishi mumkin. Biroq yuristlar bunday miqdordagi jarima ehtimoli juda pastligini aytmoqda.
Sudda Meta rahbari Mark Sukerberg, Instagram rahbari Adam Mosseri va kompaniyaning sobiq xodimlari guvohlik berishi kutilmoqda.
Ish natijasi Meta’dan Facebook va Instagram’dagi ayrim funksiyalarni o‘zgartirishni ham talab qilishi mumkin.
