Toshkentda perforator va benzopila ichiga yashirilgan narkotiklar aniqlandi
Narkotiklar Rossiyadan pochta orqali yuborilgani aniqlangan.
Toshkent shahrining Chilonzor tumanida o‘tkazilgan tezkor tadbir davomida qurilish asboblari ichiga yashirilgan “Alfa-PVP” sintetik narkotik moddasi aniqlandi. Bu haqda DXX xabar berdi.
O‘tkazilgan tezkor tadbirda Yunusobod tumanida yashovchi, 1992-yilda tug‘ilgan shaxs to‘xtatilib, tekshirilgan.
Tekshiruvda unga tegishli perforator ichiga 478 gramm “Alfa-PVP” yashirilgani aniqlangan.
Shuningdek, shu tumanda qayd etilgan boshqa holatda Mirzo Ulug‘bek tumanida yashovchi, 2009-yilda tug‘ilgan shaxsga tegishli yog‘och kesuvchi asbob — benzopila ichidan 107 gramm “Alfa-PVP” moddasi topilgan.
Tergovga qadar tekshiruvda har ikki holatda ham giyohvandlik vositalari Rossiya Federatsiyasidan pochta jo‘natmasi orqali yuborilgani aniqlangan.
Mazkur holatlar yuzasidan jinoyat ishlari qo‘zg‘atilib, hozirda tergov harakatlari olib borilmoqda.
