Boshpanasiz shaxslarni vaqtincha boshpana bilan ta’minlash tartibi belgilandi
Boshpanasiz shaxslar ko‘cha, vokzal, bozor va boshqa jamoat joylarida ichki ishlar hamda ijtimoiy xodimlar tomonidan aniqlanadi.
O‘zbekistonda muayyan yashash joyiga ega bo‘lmagan shaxslarni vaqtincha boshpana va ijtimoiy tiklanish markazlariga joylashtirish tartibi belgilandi. Bu Hukumatning 18-avgustdagi 447-son qarori bilan tasdiqlangan ma’muriy reglamentda belgilangan.
Unga ko‘ra, ichki ishlar organlari xodimlari va mahallalarda kompleks ijtimoiy xizmat ko‘rsatuvchi ijtimoiy xodimlar tomonidan ko‘cha, vokzal, bozor, yerosti yo‘laklari, yashash uchun mo‘ljallanmagan binolar va boshqa jamoat joylarida muntazam ravishda boshpanasiz shaxslar aniqlanadi. Ularga Vaqtinchalik boshpana va ijtimoiy tiklanish markazi xizmatlaridan foydalanish taklif etiladi.
Voyaga yetgan boshpanasiz shaxs markazga joylashish uchun bevosita murojaat qiladi. Agar uning voyaga yetmagan farzandlari bo‘lsa, ular ham ota yoki onasi bilan birgalikda markazga joylashtiriladi.
Markazga olib kelingan shaxslar tuman yoki shahar darajasidagi tibbiyot muassasalarining shoshilinch qabul bo‘limlarida tibbiy ko‘rikdan o‘tkaziladi.
Shaxsda markazga joylashtirishga to‘sqinlik qiluvchi shoshilinch tibbiy yordamga ehtiyoj yoki yuqumli kasalliklar aniqlanmasa, u markazga qabul qilinadi.
Boshpanasiz shaxs tomonidan so‘rovnomani to‘ldirish markazga joylashish hamda uning ichki tartib-qoidalariga rioya qilishga roziligini anglatadi.
So‘rovnoma shakllantirilganidan so‘ng shaxs markazga 7 kungacha joylashtiriladi. Ayrim belgilangan holatlarda markazda qolish muddati 6 oygacha uzaytirilishi mumkin.
Avvalroq Prezident Shavkat Mirziyoyevga muayyan yashash joyiga ega bo‘lmagan shaxslarga ijtimoiy xizmatlar ko‘rsatish tizimini takomillashtirishga qaratilgan yangi takliflar taqdim etilgandi.
Taqdimotda amaldagi reabilitatsiya muassasalarini vaqtinchalik boshpana va ijtimoiy tiklanish markazlariga aylantirish rejalashtirilayotgani ma’lum qilingandi.
