To'qayev Qozog'iston tashqi siyosatiga muhim o'zgartirish kiritdi
Yangi qabul qilingan hujjatga ko'ra, Qozog‘istonning sobiq prezidenti Nursulton Nazarboyev tashqi siyosat masallari bo'yicha fuqarolar va davlat organlariga murojaat qilish huquqidan umrbod mahrum qilindi.
Qozog‘iston Prezidenti Qosim-Jomart Toqayev mamlakatning Tashqi siyosat konsepsiyasiga o‘zgartirish kiritdi. Unga ko‘ra, Qozog‘istonning birinchi prezidenti Nursulton Nazarboyevning fuqarolar va davlat organlariga tashqi siyosat masalalari bo‘yicha murojaat qilishga doir umrbod maxsus huquqi bekor qilindi. Bu haqda Inbusiness.kz xabar berdi.
Nazarboyev 1991–2019-yillarda Qozog‘iston prezidenti lavozimida faoliyat yuritgan. 2022-yil yanvaridagi ommaviy noroziliklardan so‘ng u siyosiy ta’sirini sezilarli darajada yo‘qotdi. Jumladan, Xavfsizlik kengashi raisi lavozimidan iste’foga chiqqan va hukmron partiyaga rahbarlik qilishni to‘xtatgan.
2023-yil boshida Toqayev “Qozog‘iston Respublikasining Birinchi Prezidenti — Elbasi to‘g‘risida”gi qonunni bekor qilish haqidagi hujjatni imzolagan. Mazkur qonun Nazarboyevga “Elbasi” — “Millat yetakchisi” maqomini hamda bir qator umrbod imtiyoz va kafolatlarni bergan edi.
Nazarboyev “Elbasi” maqomini 2010-yilda olgan. Ushbu maqom doirasida davlat organlari ichki va tashqi siyosatning asosiy yo‘nalishlarini u bilan muvofiqlashtirishi nazarda tutilgan edi.
Yangilangan Tashqi siyosat konsepsiyasida boshqa tahririy va institutsional o‘zgarishlar ham kiritilgan. Jumladan, “fuqaro” atamasi “Qozog‘iston Respublikasi fuqarosi” shakliga o‘zgartirilgan.
