Baxtiyor Inoqov Surxondaryo viloyati IIB boshlig‘i etib tayinlandi
Inoqov Ichki ishlar vazirligi Akademiyasi magistratura bosqichi bitiruvchisi hisoblanadi
Podpolkovnik Baxtiyor Inoqov Surxondaryo viloyati Ichki ishlar boshqarmasi boshlig‘i etib tayinlandi. Bu haqda xalq deputatlari Surxondaryo viloyati Kengashining navbatdan tashqari sessiyasida ma’lum qilindi.
Sessiyada ichki ishlar vaziri, general-leytenant Aziz Tashpulatov, viloyat hokimi Ulug‘bek Qosimov, xalq deputatlari Kengashi a’zolari, mutasaddi idoralar rahbarlari, hamkor tashkilotlar mas’ullari, shahar va tumanlar jamoatchilik faollari hamda huquqni muhofaza qiluvchi organlar rahbarlari ishtirok etdi.
Tashkiliy masala doirasida Ichki ishlar vazirining tegishli buyrug‘iga asosan, Ichki ishlar vazirligi Akademiyasi magistratura bosqichi bitiruvchisi Baxtiyor Inoqov viloyat IIB boshlig‘i etib tayinlangani bildirildi.
Sessiyada Surxondaryodagi kriminogen vaziyat, jinoyatchilikni jilovlash bo‘yicha amalga oshirilayotgan ishlar va mavjud muammolar tahlil qilindi. Shuningdek, mahallalarda xavfsiz muhitni shakllantirish va profilaktika ishlarini kuchaytirishga qaratilgan vazifalar muhokama qilindi.
Qayd etilishicha, joriy yilning hisobot davrida viloyatdagi 723 ta mahallaning 528 tasida, ya’ni 73 foizida birorta ham jinoyat sodir etilmagan. Xodimlarning tashabbusi bilan aniqlangan jinoyatlar soni esa 40 foizga yaxshilangan.
Biroq viloyatdagi 28 ta mahalla “qizil” toifada qolayotgani tanqid qilindi. Ushbu hududlarda jinoyatchilikka sabab bo‘layotgan omillarni manzilli aniqlash va bartaraf etish zarurligi ta’kidlandi.
Yangi tayinlangan rahbar oldiga jinoyatchilikka qarshi kurashish samaradorligini oshirish, har bir mahallada xavfsizlikni ta’minlash, aholi bilan yaqin muloqotni yo‘lga qo‘yish hamda fuqarolarning murojaatlaridan kelib chiqayotgan muammolarni chuqur o‘rganib, ularga yechim topish vazifalari qo‘yildi.
Shuningdek, fuqarolarning ichki ishlar organlariga bo‘lgan ishonchini mustahkamlash, tuman va shahar IIB rahbarlarining mahallalar kesimidagi ish samaradorligini oshirish bo‘yicha topshiriqlar berildi.
Sessiya yakunida viloyatda osoyishtalikni mustahkamlash, jamoat tartibini saqlash va aholi xavfsizligini ta’minlashga qaratilgan navbatdagi chora-tadbirlar belgilandi.
21-avgust kuni Timur Kamalitdinovich Ismoilov O‘zbekiston Respublikasi ichki ishlar vazirining birinchi o‘rinbosari — Jamoat xavfsizligi departamenti boshlig‘i lavozimiga tayinlanib, Surxondaryo viloyati Ichki ishlar boshqarmasi boshlig‘i lavozimidan ozod etilgandi.
