Livan janubida bir hafta ichida 1030 ta snaryad uchirildi — UNIFIL
Otishmalar oqibatida tinch aholi zarar ko‘rgani, uylar va muhim infratuzilma obyektlari shikastlangani qayd etilgan.
BMTning Livandagi Muvaqqat kuchlari (UNIFIL) Livan janubidagi vaziyat hamon beqarorligicha qolayotganidan ogohlantirdi. Bu haqida "Anadolu" agentligi xabar berdi.
UNIFIL ma’lumotlariga ko‘ra, 21–27-avgust kunlari hududda jami 1 030 ta snaryad uchirilishi trayektoriyasi qayd etilgan. Bu kuniga o‘rtacha 147 ta snaryadni tashkil etadi.
Tashkilot zo‘ravonlik darajasi yil boshidagi davrga nisbatan pasaygan bo‘lsa-da, janubiy Livandagi vaziyatning hanuz zaif va beqaror ekanini ta’kidladi.
“Bu raqamlar ortida tinch aholiga yetkazilayotgan davomli zarar turibdi: uylar va muhim infratuzilma obyektlariga shikast yetgan, odamlar odatiy hayotni tiklash uchun kurashmoqda”, — deyiladi UNIFIL bayonotida.
Tinchlikparvar kuchlar vaziyatni kuzatishda davom etayotgani va keskinlikning yanada kuchayishiga yo‘l qo‘ymaslik uchun tomonlar bilan hamkorlik qilayotganini bildirdi.
