Qozog‘istonda xorijliklar uchun pulli elektron ruxsatnoma joriy etiladi
Yangi tartib O‘zbekiston fuqarolariga ham taalluqli bo‘ladi.
Qozog‘iston 2026-yil 1-noyabrdan mamlakatga vizasiz kirish huquqiga ega bo‘lgan xorijiy fuqarolar uchun pullik elektron kirish ruxsatnomasini bosqichma-bosqich majburiy joriy etadi. Bu haqda "Meduza" xabar berdi.
Yangi tartib O‘zbekiston fuqarolariga ham taalluqli bo‘ladi.
Yangi Electronic Travel Authorization (ETA) ruxsatnomasi QazETA raqamli platformasi orqali rasmiylashtiriladi. Ariza safardan kamida 72 soat oldin topshirilishi kerak. Ruxsatnoma 180 kun davomida amal qiladi va shu muddat ichida Qozog‘istonga bir necha marta kirish imkonini beradi.
Ruxsatnomani QazETA orqali rasmiylashtirish to‘lovi 3900 tenge (taxminan 7 yevro) bo‘lishi kutilmoqda. Chegarada rasmiylashtirilganda esa to‘lov 7800 tenge (taxminan 14 yevro)ni tashkil etadi.
Yangi tartib bosqichma-bosqich kuchga kiradi. 1-noyabrdan samolyotda Qozog‘istonga keladigan xorijliklar uchun ETA majburiy bo‘ladi.
15-noyabrdan avtomobil yoki avtobusda Qozog‘istonning Xitoy, Turkmaniston va O‘zbekiston bilan chegaralaridan kiruvchilar uchun ruxsatnoma majburiy bo‘ladi.
30-noyabrdan talab Rossiya va Qirg‘iziston bilan avtomobil orqali o‘tiladigan chegara punktlariga ham tatbiq etiladi. 15-dekabrdan esa Qozog‘istonga poyezd va dengiz transportida keluvchilar uchun ETA majburiy bo‘ladi.
Hozircha, 25-avgustdan 1-noyabrgacha tizim sinov rejimida ishlaydi va bu davrda chet elliklar ruxsatnomasiz mamlakatga kiritiladi.
Qozog‘istonning rasmiy QazETA platformasida ETA vizasiz rejimdagi davlatlar fuqarolari uchun mo‘ljallangani qayd etilgan. Platformada O‘zbekiston va Qirg‘iziston fuqarolarining ID-kartalari ham qabul qilinadigan hujjatlar qatorida ko‘rsatilgan.
