Saida Mirziyoyeva Qatarda “O‘zbekiston: harakatdagi meros” ko‘rgazmasining ochilishida ishtirok etdi

 

Prezident Administratsiyasi rahbari Saida Mirziyoyeva Shayxa Al-Mayassa bint Hamad bin Xalifa Ol Soniy bilan birgalikda Qatar Islom san’ati muzeyida tashkil etilgan “O‘zbekiston: harakatdagi meros” ko‘rgazmasining ochilish marosimida ishtirok etdi.

 

Ko‘rgazmadan O‘zbekiston muzeylari hamda Qatar kolleksiyalaridan o‘rin olgan noyob eksponatlar joy olgan. Ekspozitsiya islom dini tarqalishidan avvalgi davrlardan boshlab Somoniylar va Temuriylar davrlari hamda bugungi kungacha bo‘lgan tarixiy bosqichlarni qamrab oladi.

 

Unda O‘zbekistonning boy tarixiy va madaniy merosini aks ettiruvchi nodir osori-atiqalar, an’anaviy hunarmandchilik va to‘qimachilik san’ati namunalari namoyish etilmoqda.

 

Saida Mirziyoyeva ushbu ko‘rgazma Qatar xalqi va mamlakat mehmonlarini O‘zbekistonning boy tarixi va madaniy merosi bilan yaqindan tanishtirish uchun muhim imkoniyat ekanini ta’kidladi. Shuningdek, mazkur loyiha O‘zbekiston-Qatar madaniy aloqalarini yanada rivojlantirishga xizmat qilishi qayd etildi.

 

Shu kuni qatarlik yetti nafar hunarmandning Toshkent, Samarqand va Buxoro shaharlariga uyushtirilgan ijodiy safari yakunlariga bag‘ishlangan “Ektashif O‘zbekiston” ko‘rgazmasi ham o‘z ishini boshladi.

 

Unda O‘zbekistonning boy madaniyati va an’analaridan ilhomlangan qatarlik hunarmandlar tomonidan yaratilgan zargarlik buyumlari, xattotlik san’ati namunalari, nafis gilamlar hamda ijodiy safar taassurotlarini aks ettiruvchi fotosuratlar namoyish etilmoqda.