Toshkentda 1,2 kilometrlik BRT yo‘lagi foydalanishga topshirildi
Shahrisabz ko‘chasidagi BRT loyihasining birinchi bosqichi doirasida yangi avtobus bekatlari va alohida harakat yo‘lagi tashkil etilib, yo‘l infratuzilmasi to‘liq qayta qurildi.
Toshkent shahridagi Shahrisabz ko‘chasida BRT yo‘lagining birinchi bosqichi foydalanishga topshirildi. Bu haqda Toshkent shahrida Yo‘l harakatini tashkil etish markazi xabar berdi.
Mazkur uchastka Shahrisabz, Mirobod va Shota Rustaveli ko‘chalari tutashgan aylanma chorrahadan Amir Temur shoh ko‘chasi bilan kesishmagacha bo‘lgan 1,2 kilometrlik qismni qamrab oladi.
Qayd etilishicha, loyiha doirasida yo‘lning mavjud qoplamasi yangilanibgina qolmay, ostki konstruksiyasi ham to‘liq qayta qurildi. Ayrim qismlarda 2 metrdan ortiq chuqurlikkacha qazish ishlari bajarilib, yo‘l poydevori qayta shakllantirildi. Grunt namligi va keyinchalik cho‘kish xavfini kamaytirish uchun geotekstil qoplamasi yotqizildi.
Yo‘l asosi 35 santimetr qalinlikdagi qum-shag‘al aralashmasi, M-75 markali mustahkamlovchi qatlam, 9 santimetr qalinlikdagi yirik donali asfalt-beton va 5 santimetr qalinlikdagi PSHMA-20 qatlamidan tashkil etildi.
BRT infratuzilmasi doirasida 5 ta yangi avtobus bekati tashkil etilib, jamoat transporti uchun alohida harakat yo‘lagi yaratildi. Yo‘lak umumiy transport oqimidan bordyurlar yordamida jismonan ajratildi.
Xabarga ko‘ra, qurilish ishlari davomida transport harakati to‘liq to‘xtatilmadi. Ishlar bosqichma-bosqich olib borilib, ko‘chaning ikki yo‘nalishidagi chekka o‘ng tasmalarda transport harakati saqlab qolindi.
Shahrisabz ko‘chasidagi 1,2 kilometrlik uchastka BRT infratuzilmasini tashkil etish bo‘yicha loyihaning birinchi bosqichi hisoblanadi. Umumiy loyiha doirasida ko‘chaning qariyb 3 kilometrlik qismida BRT yo‘lagini tashkil etish rejalashtirilgan.
Avvalroq, Mirobod tumanidagi Shahrisabz ko‘chasida BRT (Bus Rapid Transit) yo‘lagini tashkil etish bo‘yicha qurilish-ta’mirlash ishlari boshlangani haqida xabar berilgandi.
