FIFA va UEFА o‘rtasida Infantino rejasi sababli mojaro kuchaydi

FIFА AQSH sudiga kiritgan hujjatida Yevropa futbol tashkiloti UEFA‘ni tashkilot rahbariyati va prezidenti Janni Infantinog‘a qarshi «tuhmat kampaniyasi» olib borayotganlikda ayblagan. FIFА UEFA‘ning AQSH sudlaridagi so‘rovlarini to‘xtatish yoki kechiktirishni so‘ragan. Bu haqda AP News xabar berdi.

Janjal FIFА Forward Enterprise deb nomlangan loyiha atrofida yuzaga kelgan. Mazkur tashabbus orqali Jahon chempionati va FIFA‘ning boshqa musobaqalaridagi ulushlarni xususiy kapital investorlariga sotish evaziga 4,2 milliard dollar jalb qilish rejalashtirilgan edi. FIFА bu rejadan 1-avgust kuni, taklif jamoatchilikka maʼlum bo‘lganidan bir necha kun o‘tib, kuchli qarshiliklar ortidan voz kechgan.

Shundan so‘ng UEFА AQSHning Nyu-York, Florida va Kolorado shtatlaridagi sudlariga dalillarni oshkor qilish bo‘yicha so‘rovlar kiritgan. Ulardan biri Jared Kushnerning ukasi Josh Kushner va uning Thrive Capital Management investitsiya kompaniyasiga tegishli hujjatlarni olishni ko‘zda tutgan.

FIFА Koloradodagi sudga kiritgan arizasida UEFA‘ning hujjat talablarini «UEFA va uning rahbariyatiga qarshi tuhmat kampaniyasini qo‘llab-quvvatlovchi press-relizlardan boshqa narsa emas» deb atagan. Tashkilot UEFА xorijiy jinoiy ish doirasida dalillarni talab qilayotganini, biroq bunday jinoyat ishi hali mavjud emasligini bildirgan.

UEFА esa Infantinog‘a nisbatan Shveysariya sudlarida moliyaviy boshqaruv bilan bog‘liq ehtimoliy huquqbuzarliklar yuzasidan jinoiy shikoyat tayyorlayotganini maʼlum qilgan. UEFА yuristlari FIFА Forward Enterprise loyihasi Infantino va uning yaqin doirasiga FIFA‘ning eng qimmat aktivlaridan doimiy ulush olish hamda ulardan foyda ko‘rish imkonini berishi mumkinligini daʼvo qilgan.

FIFA, o‘z navbatida, UEFА Yevropadagi futbol federatsiyalariga FIFА Forward Enterprise rejasiga qarshi chiqish uchun bosim o‘tkazganini ham ayblagan. UEFA bu daʼvolarga munosabatini ushbu sud jarayoni doirasida bildirgan.