Raqobat qo‘mitasi internet va raqamli xizmatlar platformalarini o‘rganmoqda
O‘rganishlarda ayrim platformalarda tariflar, narxlar, xizmat ko‘rsatish shartlari va ommaviy oferta to‘liq joylashtirilmagani aniqlangan.
Raqobat qo‘mitasi striming, internet va raqamli televideniye xizmatlarini ko‘rsatuvchi tashkilotlarning mobil ilovalari va veb-saytlarini o‘rganishni boshladi. 2026-yilda telekommunikatsiya xizmatlari bo‘yicha iste’molchilar murojaatlari soni o‘tgan yilning mos davriga nisbatan ikki barobarga oshib, 1000 tadan ortgan.
Tekshiruvlarda platformalarda tariflar va narxlar, xizmat ko‘rsatish shartlari, ommaviy oferta hamda boshqa zarur ma’lumotlar to‘liq joylashtirilmagani aniqlangan.
Shuningdek, ayrim operator va provayderlarning platformalarida ma’lumotlar davlat tilida taqdim etilmayotgani ham qayd etilgan.
Qo‘mita hozirda ushbu xizmatlarni ko‘rsatuvchi tashkilotlarning ochiq platformalarini iste’molchilar uchun zarur axborotlarni taqdim etish hamda amaldagi qonunchilik talablariga muvofiqligi nuqtayi nazaridan o‘rganmoqda.
Xizmat ko‘rsatuvchi tashkilotlardan mobil ilova va veb-saytlaridagi ma’lumotlarni to‘liq taqdim etish hamda ularni qonunchilik talablariga muvofiqlashtirish talab qilingan.
Qo‘mita o‘rganish yakunlari bo‘yicha qo‘shimcha ma’lumot berilishini bildirgan. Iste’molchilar o‘z takliflarini info@raqobat.gov.uz va consumer@antimon.gov.uz elektron manzillariga yuborishi mumkin.
