Zelenskiy va uning oilasiga umrbod davlat himoyasi berilishi taklif qilindi
Hujjatga ko‘ra, harbiy holat davrida faoliyat yuritgan ayrim yuqori martabali mansabdor shaxslarga ham davlat himoyasi berilishi mumkin.
Ukraina Prezidenti Volodimir Zelenskiy va uning oila a’zolariga umrbod davlat himoyasini ta’minlashni nazarda tutuvchi qonun loyihasi Oliy Radaga taqdim etildi. Bu haqda Ukraina parlamentining rasmiy veb-saytida e’lon qilingan hujjat ma’lumotlarida qayd etilgan.
Qonun loyihasi mualliflaridan biri Ukraina parlamentining Milliy xavfsizlik, mudofaa va razvedka qo‘mitasi kotibi Roman Kostenko hisoblanadi.
Hujjatga ko‘ra, Prezident bilan birga yashaydigan yoki unga hamrohlik qiladigan oila a’zolariga, Prezidentning impichment orqali lavozimidan chetlatilishi bundan mustasno, uning vakolatlari tugaganidan keyin ham umrbod davlat himoyasi taqdim etilishi taklif qilinmoqda.
Shuningdek, qonun loyihasida harbiy holat davrida o‘z vazifalarini bajargan Bosh shtab hamda Milliy xavfsizlik va mudofaa kengashi a’zolariga davlat himoyasi berilishi ko‘zda tutilgan.
Mazkur taklif munosabati bilan Ukraina Davlat xavfsizlik boshqarmasi xodimlarining umumiy sonini 5 500 nafargacha oshirish ham nazarda tutilmoqda.
Ukrainada harbiy holat 2022-yil 24-fevralda joriy etilgan va shundan buyon bir necha bor uzaytirilgan. Zelenskiyning prezidentlik muddati rasman 2024-yil 20-mayda yakunlangan. Ukraina rasmiylari esa harbiy holat davom etayotgan paytda muntazam prezidentlik saylovlarini o‘tkazish mumkin emasligini bildirgan.
