AQSh Eronning uchta neft tankeriga zarba berdi

AQSh harbiylari Eronning uchta neft tankeriga zarba berdi. AQSh Markaziy qo‘mondonligi (CENTCOM) ma’lum qilishicha, hujum Eron Islom inqilobi qo‘riqchilari korpusi (IIQK) tomonidan AQSh harbiy-dengiz kuchlarining ikki kemasiga ballistik raketalar uchirilganidan keyin amalga oshirilgan.

 

Zarba berilgan tankerlarning biri Eronning asosiy neft eksport terminali joylashgan Xarg oroli yaqinida bo‘lgan. AQSh tomoni hujum oqibatida ikki tanker doimiy ravishda foydalanishdan chiqarilgani, yana bir yuklanmagan tanker esa yo‘q qilinganini bildirgan.

 

CENTCOM rahbari admiral Bred Kuperning aytishicha, AQSh kemalariga hujum qilinsa, Vashington Eronning neft tashish imkoniyatlariga qarshi yanada keskin choralar ko‘rishi mumkin.

 

“Agar siz bizning ikkita kemamizga o‘q uzsangiz, biz bundan ham kattaroq iqtisodiy zarar yetkazamiz — sizning uchta kemangizni yo‘q qilamiz”, — degan Kuper.

 

AQSh Markaziy qo‘mondonligi ma’lumotlariga ko‘ra, Eron tomonidan uchirilgan raketalar nishoniga olingan AQSh aviatashuvchisi va boshqariladigan raketa tashuvchi esminets hujumlardan qochishga muvaffaq bo‘lgan. Amerika harbiy xizmatchilaridan hech kim jarohatlanmagan.

 

Eronning Tasnim agentligi esa Xarg oroli yaqinidagi langar tashlash hududida turgan tankerga AQShning to‘rtta raketasi tegganini xabar qilgan. Agentlikka ko‘ra, hodisa oqibatida qurbonlar bo‘lmagan, tanker ekipaji esa evakuatsiya qilingan.

 

Eron rasmiylari hujumlarga hozircha rasman munosabat bildirmagan.

 

Reuters qayd etishicha, hodisa AQSh va Eron o‘rtasidagi so‘nggi kunlarda kuchaygan qarama-qarshiliklar fonida yuz berdi. Mojaro fevral oyida AQShning Eronga qarshi zarbalaridan so‘ng keskinlashgan va mintaqadagi energiya ta’minotiga jiddiy ta’sir ko‘rsatgan.

 

AQSh Prezidenti Donald Tramp 31-avgust kuni Xarg oroli “mayda bo‘laklarga parchalanayotganini” aytgan. Eron rasmiylari esa orolga hujum qilingan taqdirda keskin javob qaytarilishini bildirgan.