“Sizlar 7,5 million kishisiz, men esa bittaman” — Sadir Japarov
Qirg‘iziston prezidenti kuniga atigi to‘rt soat uxlashi va qolgan 20 soatini ish bilan o‘tkazishini maʼlum qildi.
Qirg‘iziston prezidenti Sadir Japarov kuniga to‘rt soat uxlashi va qolgan vaqtini ishga sarflashini aytdi. U bu haqda Jalolobod viloyatining Bozor-Qo‘rg‘on tumani aholisi bilan uchrashuvda fuqarolarning shaxsiy qabulga kira olmayotgani haqidagi shikoyatiga javoban maʼlum qildi.
Uchrashuvda qatnashgan fuqarolardan biri prezident bilan shaxsan uchrashishga bir necha bor uringanini, biroq bunga erisha olmaganini aytgan.
Bunga javoban Sadir Japarov mamlakatda 7,5 millionga yaqin fuqaro borligi va ularning barchasini shaxsan qabul qilishning imkoni yo‘qligini tushuntirgan.
“Uchrashuvga kira olmayapman, demang. Sizlar 7,5 million kishisiz, men esa bittaman. Agar hamma meni ko‘rgani kelsa, barchasini qabul qila olmasdim. Mening o‘z ish jadvalim bor. 24 soatdan atigi to‘rt soat uxlayman, qolgan 20 soatni ishda o‘tkazaman”, — degan u.
Prezident bunday jadval bilan ham barcha muammolarni hal qilish uchun vaqt yetishmasligini qo‘shimcha qilgan.
Shuningdek, Sadir Japarov ayrim huquqni muhofaza qilish organlari xodimlarining noqonuniy xatti-harakatlari haqida shikoyat qilgan fuqaroning murojaatini tekshirishni masʼul shaxslarga topshirgan. U fuqarolardan noqonuniy ravishda pul talab qilingan-qilinmaganini, mablag‘ni kim va qancha miqdorda olganini aniqlash zarurligini taʼkidlagan.
