BMT dunyo xaritasini o‘zgartirishni ma’qulladi
Qaror Merkator proyeksiyasida Afrikaning haqiqiy hajmi aks ettirilmagani bilan bog‘liq.
BMT Bosh Assambleyasi Afrikaning haqiqiy hajmini aniqroq aks ettiruvchi dunyo xaritasidan foydalanishga o‘tishni qo‘llab-quvvatladi. Togo tomonidan ilgari surilgan rezolyutsiyani 164 davlat ma’qullagan, AQSH qarshi ovoz bergan, olti davlat esa betaraf qolgan.
“Xaritani to‘g‘rilash” deb nomlangan rezolyutsiya majburiy kuchga ega emas. Biroq u dunyo bo‘ylab turli muassasalar foydalanadigan xaritalarni o‘zgartirishga turtki berishi mumkin.
Gap XVI asrdan buyon keng qo‘llanib kelayotgan Merkator proyeksiyasi haqida bormoqda. Ushbu xaritada qutblarga yaqin hududlar aslidan kattaroq, ekvator atrofidagi hududlar esa kichikroq tasvirlanadi. Xususan, Afrika va Grenlandiya xaritada deyarli bir xil hajmda ko‘rinadi, holbuki Afrika Grenlandiyadan 14 baravar katta.
2018-yilda kartograflar qit’alar maydonini nisbatan aniqroq aks ettiruvchi “Equal Earth” proyeksiyasini ishlab chiqqan. Joriy yil fevral oyida Afrika Ittifoqining 54 a’zo davlati ushbu proyeksiyani qabul qilgan.
Togo tashqi ishlar vaziri Robert Dussey xaritalar hududlar va xalqlarning dunyodagi o‘rni haqidagi tasavvurlarni shakllantirishini ta’kidladi. Fransiya tashqi ishlar vaziri Jean-Noel Barrot ham Merkator xaritasidan foydalanishni to‘xtatish rejalashtirilganini ma’lum qildi.
AQSH vakili esa rezolyutsiyani tanqid qilib, BMT Bosh Assambleyasi xalqaro tinchlik va farovonlik kabi muhim masalalarga e’tibor qaratishi kerakligini bildirdi.
Tashabbus tarafdorlari Afrika xaritalarda kichraytirib ko‘rsatilishi qit’aning resurslari, aholisi va iqtisodiy salohiyati haqidagi tasavvurlarga ham ta’sir qilishini ta’kidlamoqda.
