Endi fuqarolar Prezident Xalq qabulxonasiga yuborilgan o‘z murojaatini nazorat qiladi
Murojaat bo‘yicha javob tayyorlangach, fuqaroga maxsus havolani o‘z ichiga olgan SMS-xabarnoma yuboriladi.
Fuqarolarning davlat organlariga yuborgan murojaatlarini kuzatishi va ular bo‘yicha berilgan javoblarga munosabat bildirishi uchun yangi imkoniyat yaratildi.
Prezident Xalq qabulxonasi Raqamli texnologiyalar vazirligi bilan hamkorlikda qayta aloqa — SMS-xabarnoma yuborish xizmatini ishga tushirdi.
Endilikda murojaatning ko‘rib chiqilish jarayonidagi har bir bosqich haqida fuqaroning pm.gov.uz saytida ro‘yxatdan o‘tgan telefon raqamiga SMS orqali xabar berib boriladi. Shuningdek, fuqaro murojaatining holatini saytdagi shaxsiy kabineti orqali real vaqt rejimida kuzatishi mumkin.
Murojaat ko‘rib chiqilib, unga javob berilgach, fuqaroga maxsus havolani o‘z ichiga olgan SMS-xabarnoma yuboriladi. Havola orqali shaxsiy kabinetga kirib, murojaat yuzasidan berilgan javob bilan tanishish va unga o‘z munosabatini bildirish mumkin.
Agar fuqaro berilgan javobdan qoniqsa yoki murojaatida ko‘tarilgan masala hal etilgan bo‘lsa, “Roziman” tugmasini bosadi.
Aksincha, javobdan norozi bo‘lsa yoki muammo hal etilmagan deb hisoblasa, “E’tirozim bor” tugmasini bosishi mumkin. Bunday holatda murojaat qayta ijroga qaytarilib, masala yana ko‘rib chiqiladi.
Yangi xizmat murojaatlarni ko‘rib chiqish jarayonining shaffofligini oshirish, fuqarolarning o‘z murojaatlari ustidan nazoratini kuchaytirish hamda davlat organlari bilan qayta aloqani yaxshilashga xizmat qiladi.
