KXDR Janubiy Koreya bilan birlashish siyosatiga oid bandni bekor qildi
Nizomdan Janubiy Koreya bilan birlashish masalasidan tashqari, Janubiy Koreyada joylashgan AQSh harbiy kuchlari hamda “tashqi kuchlar”ga oid ayrim havolalar ham olib tashlangan.
Shimoliy Koreyada hukmron Koreya Mehnat partiyasi o‘z nizomidan Janubiy Koreya bilan tinch yo‘l orqali birlashish haqidagi bandni olib tashladi. Nizomning yangilangan matni ilk bor Seul Milliy xavfsizlik strategiyasi instituti tomonidan e’lon qilindi. Bu haqda Yonhap axborot agentligi xabar berdi.
Ma’lum qilinishicha, Janubiy Koreya razvedkasi 2024-yil iyun oyida KXDR hukmron partiyasi nizomiga o‘zgartirishlar kiritilganini bildirgan, biroq hujjatning to‘liq matni shu vaqtgacha jamoatchilikka taqdim etilmagan. E’lon qilingan hujjatda, shuningdek, 2026-yil fevral oyida Koreya Mehnat partiyasining IX syezdida qabul qilingan tuzatishlar ham aks etgan.
Yangilangan nizomda Shimoliy Koreya yetakchisi Kim Chen Inning vakolatlari kengaytirilgan. Shu bilan birga, partiyaning avvalgi rahbarlari Kim Ir Sen va Kim Chen Irning faoliyati hamda yutuqlariga oid ayrim ma’lumotlar hujjatdan chiqarib tashlangan. Mutaxassislar buni Kim Chen Inning partiyadagi yagona va mutlaq rahbar sifatidagi mavqeini yanada mustahkamlashga qaratilgan qadam sifatida baholamoqda.
Nizomdan Janubiy Koreya bilan birlashish masalasidan tashqari, Janubiy Koreyada joylashgan AQSh harbiy kuchlari hamda “tashqi kuchlar”ga oid ayrim havolalar ham olib tashlangan.
Tahlilchilarga ko‘ra, mazkur o‘zgarishlar Pxenyanning Shimoliy va Janubiy Koreyani alohida davlatlar sifatida ko‘rish pozitsiyasini yanada kuchaytirayotganidan dalolat beradi.
Avvalroq, 2024-yil oktabr oyida Kim Chen In tashabbusi bilan Janubiy Koreya bilan tinch yo‘l orqali birlashish haqidagi band KXDR Konstitutsiyasidan ham chiqarib tashlangan edi.
Yangilangan nizomda Koreya Mehnat partiyasi bosh kotibining vakolatlari ham kengaytirilgan. Jumladan, unga yig‘ilishlar chaqirish, mansabdor shaxslarni tayinlash va lavozimidan ozod etish, shuningdek, partiya bo‘limlarini tugatish vakolatlari berilgan.
Bundan tashqari, yangi qoidalarga ko‘ra, urush davrida partiya ichidagi saylovlarni bekor qilish imkoniyati ham nazarda tutilgan. Partiyaga a’zo bo‘lishning eng kam yoshi esa 18 yoshdan 20 yoshgacha oshirilgan.
