O‘zbekistonda bitiruvchilari eng yuqori natija ko‘rsatgan top-20 oliygoh aniqlandi

O‘zbekistonda bitiruvchilar bandligi, daromadi, ishga joylashish tezligi va barqaror bandlik ko‘rsatkichlari tahlil qilindi. “Bitiruvchilar sifati indeksi” natijalariga ko‘ra, eng yuqori ko‘rsatkich qayd etgan 20 ta oliy ta’lim muassasasi ro‘yxati e’lon qilindi. Bu haqda Ta’lim sifatini ta’minlash milliy agentligi axborot xizmati xabar berdi.

 

Qayd etilishicha, top-20 oliygoh to‘rt toifa — ijtimoiy-gumanitar, amaliy, tibbiyot, ijod va sport fanlari yo‘nalishlari bo‘yicha saralangan. Ro‘yxatdagi oliygohlarning 11 tasi ijtimoiy-gumanitar, 5 tasi amaliy, 2 tasi tibbiyot hamda 2 tasi ijod va sport yo‘nalishlariga tegishli.

 

Yo‘nalishlar bo‘yicha eng yuqori natijalarni quyidagi oliygohlar qayd etgan:

 

Ijod va sport fanlari:

 

• O‘zbekiston davlat konservatoriyasi — 81,5 ball;
• O‘zbekiston davlat konservatoriyasining Nukus filiali — 79,6 ball.

 

Ijtimoiy-gumanitar fanlar:

 

• Toshkent shahridagi Webster universiteti — 76,3 ball;
• Osiyo xalqaro universiteti — 73,4 ball;
• Xalqaro Nordik universiteti — 72,1 ball.

 

Amaliy fanlar:

 

• Toshkent shahridagi Inha universiteti — 74,2 ball;
• Navoiy davlat konchilik va texnologiyalar universiteti — 72,4 ball;
• Olmaliq davlat texnika instituti — 69,1 ball.

 

Tibbiyot fanlari:

 

• Toshkent davlat tibbiyot universitetining Termiz filiali — 74,0 ball;
• Farg‘ona jamoat salomatligi tibbiyot instituti — 64,0 ball.

 

Umumiy natijalar bo‘yicha eng yuqori ko‘rsatkich O‘zbekiston davlat konservatoriyasida qayd etilgan — 81,5 ball.

 

Agentlik ma’lumotiga ko‘ra, “Bitiruvchilar sifati indeksi” ish beruvchilar uchun oliy ta’lim muassasalari bitiruvchilarining tayyorgarlik darajasini baholashda muhim ko‘rsatkichlardan biri bo‘lib xizmat qiladi.