Qozog‘istonga pullik elektron kirish ruxsatnomasi viza hisoblanmaydi — ekspert
ETA uchun to‘lov viza to‘lovi hisoblanmaydi, biroq majburiy tartib joriy etilsa, sayohatchilar uchun qo‘shimcha xarajatga aylanishi mumkin.
Qozog‘istonda vizasiz davlatlar fuqarolari uchun joriy etilayotgan elektron sayohat ruxsatnomasi (ETA) vizasiz kirish rejimini pullik viza tartibiga aylantirmaydi. Bu haqda Qozog‘iston migratsiya qonunchiligiga ixtisoslashgan advokat Aygerim Xandullaeva TASS nashriga ma’lum qildi.
Qayd etilishicha, 25-avgustdan boshlab Qozog‘iston Rossiya kabi vizasiz davlatlar fuqarolari uchun elektron kirish ruxsatnomasi tizimini sinovdan o‘tkazmoqda. Hozirda ETA tavsiya xarakteriga ega. Uni noyabr oyining boshidan aeroportlar orqali kiruvchi vizasiz davlatlar fuqarolari uchun, keyinchalik esa boshqa chegara o‘tish punktlarida ham majburiy qilish rejalashtirilmoqda.
ETA uchun to‘lov miqdori va uni undirish tartibi hozircha tegishli idoralar tomonidan muhokama qilinmoqda.
Advokatning ta’kidlashicha, ETA viza emas, balki mamlakatga kirishdan oldin rasmiylashtiriladigan va migratsiya nazoratini amalga oshirishga xizmat qiladigan alohida mexanizmdir. Shu sababli uning joriy etilishi vizasiz rejimning bekor qilinishi yoki boshqa nom ostida viza tartibining o‘rnatilishi degani emas.
Xandullaeva majburiy ETA uchun to‘lov amalda sayohat bilan bog‘liq qo‘shimcha xarajatga aylanishi mumkinligini qayd etgan. Uning so‘zlariga ko‘ra, davlat mazkur tizim orqali chet elliklarni mamlakatga kelishidan avval tekshirish imkoniyatini kengaytiradi.
Ekspertning fikricha, yangi tizim chet elliklarga safar oldidan ularning kirish huquqi va migratsiya holati bo‘yicha aniqroq ma’lumot olish imkonini beradi.
Shu bilan birga, advokat ETA tizimining uzluksiz va ishonchli ishlashi muhimligini ta’kidlagan. Uning qayd etishicha, texnik nosozliklar yoki ortiqcha murakkab tartiblar qonuniy ravishda mamlakatga kirish imkoniyatini amalda cheklamasligi kerak.
