Saudiya Arabistoni AQSHdan 5 milliard dollarlik aviabombalar sotib oladi
Bitim doirasida 227 va 907 kilogrammlik 10 mingta aviabomba yetkazib berilishi ko‘zda tutilgan.
AQSh Davlat departamenti Saudiya Arabistoniga qiymati qariyb 5 milliard dollarga teng JDAM-ER uzoq masofaga uchadigan aniq boshqariladigan o‘q-dorilar va ularga tegishli uskunalarni sotishni ma’qulladi. Bu haqda Reuters xabar berdi.
AQSh Davlat departamenti bayonotida ta’kidlanishicha, taklif etilayotgan savdo Saudiya Arabistonining havo mudofaasi salohiyatini kuchaytirish, mintaqadagi mavjud va kelajakdagi tahdidlarga qarshi turish hamda AQSh va Fors ko‘rfazi mintaqasidagi boshqa hamkorlar qo‘llaydigan tizimlar bilan o‘zaro hamkorlikni yaxshilashga xizmat qiladi.
Departament mazkur kelishuv AQShning tashqi siyosati va milliy xavfsizlik maqsadlariga ham mos kelishini bildirgan.
Saudiya Arabistoni jami 10 mingta JDAM-ER o‘q-dorisi va yo‘naltiruvchi to‘plamlarni so‘ragan. Ular orasida 227 kilogrammlik 5 mingta va 907 kilogrammlik yana 5 mingta aviabomba mavjud.
JDAM-ER — an’anaviy bombalarni GPS orqali boshqariladigan yuqori aniqlikdagi o‘q-dorilarga aylantirish imkonini beruvchi tizim bo‘lib, ochiladigan qanotlar va boshqariladigan dum qismiga ega. Uning uchish masofasi 75 kilometrgacha yetishi mumkin.
Kelishuv bo‘yicha bosh pudratchi sifatida Boeing ko‘rsatilgan.
Shuningdek, AQSh Davlat departamenti Saudiya Arabistoniga qariyb 750 million dollarga AGT-1500 dvigatellarini sotish imkoniyatini ham ma’qullagan. Mazkur mahsulotlarni Honeywell yetkazib berishi ko‘zda tutilgan.
Biroq JDAM-ER o‘q-dorilarini Saudiya Arabistoniga sotish bo‘yicha kelishuv hali yakuniy kuchga kirgani yo‘q. AQSh Davlat departamenti bu haqda Kongressni xabardor qilgan va bitim qonunchilar tomonidan ko‘rib chiqilishi kerak.
