YI davlatlari noqonuniy migrantlarni Yevropadan tashqaridagi qaytarish markazlariga yubormoqchi

Daniya, Germaniya, Avstriya, Niderlandiya va Gretsiya 2027-yilgacha boshpana olish haqidagi arizasi rad etilgan ayrim migrantlarni Yevropa Ittifoqidan tashqarida tashkil etiladigan “qaytarish markazlari”ga yuborish tizimini yo‘lga qo‘yishni rejalashtirmoqda. Besh davlat bu borada umumiy modelni ishlab chiqishga kelishib oldi.

 

Bu haqda 4-sentyabr kuni Kopengagenda bo‘lib o‘tgan besh davlat ichki ishlar va migratsiya masalalari vazirlari uchrashuvi yakunida ma’lum qilindi.

 

“Qaytarish markazlari” kelib chiqish mamlakatiga qaytarishning imkoni bo‘lmagan va boshpana so‘rovi rad etilgan migrantlarni joylashtirish uchun mo‘ljallanadi. Bunday markazlarni YIga kirmaydigan bir yoki bir nechta hamkor davlat hududida tashkil etish rejalashtirilmoqda. Hozircha qaysi davlatlar bilan muzokara olib borilayotgani oshkor qilinmagan.

 

Daniya migratsiya va integratsiya vaziri Morten Bodskovning aytishicha, tomonlar 2027-yil davomida dastlabki migrantlarni YI tashqarisidagi hamkor davlatga yuborishga tayyor bo‘lishni maqsad qilgan.

 

Besh davlat markazlarni moliyalashtirishi, hamkor mamlakatlarga qo‘shimcha mablag‘, tijoriy kelishuvlar yoki boshqa rag‘batlantirish choralarini taklif qilishi mumkin. Tizim YI qonunchiligi va xalqaro majburiyatlarga muvofiq ravishda, xalqaro tashkilotlar bilan hamkorlikda amalga oshirilishi rejalashtirilmoqda.

 

Tashabbus tarafdorlari yangi tizim noqonuniy migratsiyani kamaytirish va odam savdosi bilan shug‘ullanuvchi guruhlar faoliyatiga zarba berishga yordam berishini ta’kidlamoqda.

 

Biroq loyiha inson huquqlari bilan bog‘liq xavotirlarni ham keltirib chiqarmoqda. Huquq himoyachilari migrantlarni YI hududidan tashqaridagi markazlarga yuborish ularning huquqiy himoyasi va boshpana olish imkoniyatlariga salbiy ta’sir ko‘rsatishi mumkinligidan ogohlantirmoqda.

 

Besh davlat vakillari sentyabr oxirida Myunxenda yana uchrashib, loyiha bo‘yicha muzokaralarni davom ettirishni rejalashtirgan.