2023-yildan beri Isroilning Livanga hujumlarida qariyb 9 ming kishi halok bo‘ldi

Livan sog‘liqni saqlash idoralari ma’lumotlariga ko‘ra, so‘nggi uch yil davomida Isroilning Livanga uyushtirgan hujumlarida halok bo‘lganlar soni 8 900 nafardan oshgan, yaradorlar soni esa qariyb 30 600 nafarga yetgan. Bu haqda Al Jazeera xabar berdi.

 

Livan Sog‘liqni saqlash vazirligi shanba kuni bergan bayonotida 2023-yil oktyabridan 2026-yil sentyabrigacha bo‘lgan davrda Isroil hujumlari oqibatida 8 920 kishi halok bo‘lgani va 30 595 kishi yaralanganini ma’lum qildi.

 

Bu raqamlar 2-martdan beri qayd etilgan 4 358 nafar halok bo‘lgan va 12 359 nafar yaralangan kishini ham o‘z ichiga oladi.

 

Sog‘liqni saqlash vazirligi chorshanba kuni e’lon qilgan hisobotda, shuningdek, 2-martdan beri tez yordam brigadalariga 179 ta Isroil hujumi uyushtirilgani va ularda 135 nafar tibbiyot xodimi halok bo‘lgani qayd etilgan.

 

Bu sana Isroilning Livanga qarshi urushni navbatdagi kuchaytirgan kuniga to‘g‘ri keladi. O‘sha kuni «Hizbulloh» shimoliy Isroilga raketa uchirgach, Isroilning Bayrutga bergan zarbasi oqibatida 31 kishi halok bo‘lgan.

 

BMTning qochqinlar bo‘yicha agentligi — UNHCR ma’lumotlariga ko‘ra, avgust oyida Livanda 360 ming kishi Isroil tahdidi sabab uy-joyini tark etishga majbur bo‘lgan. Ularning kamida 22 ming nafari jamoaviy boshpanalarda yashagan.

 

Bu ma’lumotlar iyun oyida AQSh vositachiligida imzolangan ikki tomonlama «tinchlik» kelishuviga qaramay, Livanning janubida Isroil zo‘ravonligi kuchayib borayotgan bir paytda e’lon qilindi.

 

Juma kuni Livan janubidagi Kfar Rumman hududiga berilgan Isroil havo zarbasi oqibatida uch kishi halok bo‘lib, 23 kishi yaralangan.

 

Shuningdek, Livan Milliy axborot agentligi Isroil kuchlari Tir va Nabatiya okruglaridagi yetti aholi punktini havo hujumlari va artilleriya o‘qlaridan nishonga olganini xabar qildi. Qurbonlar haqida ma’lumot berilmagan.

 

Yakshanba kuni erta tongda esa Isroil harbiy samolyotlari Livan janubidagi Zavtar ash-Sharqiya hududiga zarba bergan.