Toshkentda kuryerni haqoratlagan qorovul 10 sutkaga qamaldi
Sud qorovulni Ma’muriy javobgarlik to‘g‘risidagi kodeksning 183-moddasi bilan aybdor deb topdi.
Ijtimoiy tarmoqlarda qorovulning yetkazib berish xodimi bilan janjallashib, unga nisbatan jismoniy kuch ishlatgani va haqorat qilgani aks etgan video tarqaldi.
Yunusobod tumanlararo sudida mazkur ish ko‘rib chiqilib, qorovulga 10 sutka ma’muriy qamoq jazosi tayinlandi.
Sud majlisida tomonlarning bayonotlari tinglandi. Ish materiallariga ko‘ra, yetkazib beruvchi navbatdagi buyurtmani topshirish uchun ko‘rsatilgan manzilga borgan. Qo‘riqchi esa kuryerga mijozga qo‘ng‘iroq qilib, buyurtmani olish uchun pastga tushishini so‘rashini aytgan.
Yetkazib beruvchining aytishicha, mijoz buyurtmani olish uchun tushgan va shu vaqt davomida qorovul uni haqorat qilgan, uning boshidan kepkasini olib, qaytarib bermagan hamda qo‘pol muomalada bo‘lgan.
Qorovul esa kuryer binoga kirish tartibini buzganini aytgan. Uning so‘zlariga ko‘ra, kuryer yashovchilar bilan birga kirib ketgan va ogohlantirishlarga qaramay, binoga kirishga uringan. Mojaro davomida u kuryerni haqorat qilganini tan olgan.
Sudda kuryerning vazifasi buyurtmani manzilgacha yetkazish, qorovulning vazifasi esa begona shaxslarning binoga kirishiga yo‘l qo‘ymaslik ekani qayd etilgan. Biroq qorovulning vaziyatni nazorat qila olmagani va o‘z vakolatini suiiste’mol qilgani huquqiy baholashga sabab bo‘lgan.
Sud qorovulni O‘zbekiston Respublikasi Ma’muriy javobgarlik to‘g‘risidagi kodeksining 183-moddasida nazarda tutilgan huquqbuzarlikni sodir etgan deb topib, unga 10 sutka ma’muriy qamoq jazosi tayinladi.
