Tramp Hurmuz bo‘g‘ozi va Oyni AQSHga tegishli deb atadi
AQSH prezidenti Truth Social‘da Hurmuz bo‘g‘ozi suratini “Qo‘shma Shtatlarning yangi hududi”, Oyni esa “bizniki” degan postlarni eʼlon qildi.
AQSH prezidenti Donald Tramp Hurmuz bo‘g‘ozi va Oyning AQSHga tegishli ekanini taʼkidlovchi postlar eʼlon qildi.
Tramp Truth Social ijtimoiy tarmog‘idagi sahifasida Hurmuz bo‘g‘ozi suratini «Qo‘shma Shtatlarning yangi hududi» degan yozuv bilan joylashtirdi. Shu tariqa u bo‘g‘ozni AQSH hududi sifatida ko‘rsatgan.
Avvalroq Tramp Hurmuz bo‘g‘ozini o‘z sharafiga «Tramp bo‘g‘ozi» deb qayta nomlash imkoniyatini ko‘rib chiqayotganini bildirgan edi. Shuningdek, u Eron Hurmuz bo‘g‘ozi ustidan nazoratni yo‘qotgani va hudud hozir AQSH nazoratida ekanini aytgan.
AQSH rasmiylari bo‘g‘ozning katta qismi minalardan tozalangani va so‘nggi haftalarda uning janubiy qismidan tankerlar o‘tishi ko‘payganini taʼkidlagan. Eron tashqi ishlar vaziri o‘rinbosari Kazem G‘arib-Obodiy esa AQSHning bu boradagi daʼvolarini «tashviqot yolg‘oni» deb atagan.
Bundan tashqari, Tramp Truth Social‘da Oy suratini «Oy bizniki» degan yozuv va Amerika bayrog‘i bilan eʼlon qilgan. Shu orqali u Oyni ham AQSHga tegishli sifatida ko‘rsatgan.
Trampning ushbu postlarini eʼlon qilishiga sabab hozircha maʼlum emas.
