171 nafar fuqaro nomidan foydalanib, 220 mln so‘mlik gaz o‘zlashtirilgan

 

Qoraqalpog‘iston Respublikasi va Samarqand viloyatida qariyb 370 million so‘mlik suyultirilgan gazni o‘zlashtirish bilan bog‘liq holatlar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti ma’lum qildi.

 

Departamentning Amudaryo tumani bo‘limi tomonidan o‘tkazilgan tergovga qadar tekshiruvda “Amudaryotumangaz” mas’ul shaxslari o‘zaro til biriktirib, 7 ta MFY hududida yashovchi 171 nafar fuqaroning nomidan noqonuniy foydalangani aniqlangan.

 

Ma’lum bo‘lishicha, ushbu fuqarolarning xonadonlari umumiy foydalanishdagi tabiiy gaz tarmog‘iga ulangan bo‘lsa-da, ularning nomiga elektron kartalar ochilgan. Suyultirilgan gaz yetkazib berilgani haqida soxta ma’lumotlar rasmiylashtirilib, 220,3 million so‘mlik suyultirilgan gaz rastrata yo‘li bilan talon-toroj qilingan.

 

Shuningdek, Departamentning Nurobod tumani bo‘limi tomonidan o‘tkazilgan tergovga qadar tekshiruvda “Nurobodtumangaz” mas’ul shaxslari suyultirilgan gazni sotishdan tushgan 148,3 million so‘m mablag‘ni bankka topshirmasdan, o‘zlashtirish yo‘li bilan talon-toroj qilgani aniqlangan.

 

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 209-moddasi (mansab soxtakorligi) bilan jinoyat ishlari qo‘zg‘atilgan.

 

Hozirda holatlar yuzasidan tergov harakatlari olib borilmoqda.