AQSh Ukraina uchun “qishki paket” tayyorlamoqchi — Zelenskiy
Ukraina prezidentining ta'kidlashicha, AQSh Rossiya va Ukraina o‘rtasidagi mojaroni qish oldidan yoki qish davomida yumshatish choralarini muhokama qilmoqda.
AQSh Rossiya va Ukraina o‘rtasidagi mojaroni qish oldidan yoki qish davomida yumshatishga qaratilgan ehtimoliy choralarni muhokama qilmoqda. Bu haqda Ukraina prezidenti Vladimir Zelenskiy Axios nashriga bergan intervyusida ma’lum qildi.
Zelenskiyning so‘zlariga ko‘ra, AQSh prezidentining maxsus elchilari Stiv Uitkoff va Jared Kushner diplomatik jarayonni oldinga siljitish bo‘yicha sa’y-harakatlarni davom ettirmoqda. Ularning aytishicha, Rossiya muzokaralarga tayyor.
Ukraina prezidenti Vashington zarur bo‘lsa, Moskva bilan muzokaralar masalasida bosim o‘tkazishi mumkinligini bildirgan. Shuningdek, amerikalik vakillar Kiyevga bir qator yangi takliflarni taqdim etgan.
Mazkur takliflar energetika infratuzilmasi, don ta’minoti, elektr energiyasi obyektlari hamda neft va gaz eksporti bilan bog‘liq masalalarni qamrab oladi.
Zelenskiyning ta’kidlashicha, AQShning asosiy maqsadi qish oldidan yoki qish davomida Rossiya va Ukrainani tinchlikka yaqinlashtirishi mumkin bo‘lgan choralarni aniqlashdan iborat.
Shuningdek, Vashington Ukraina uchun havo mudofaasi tizimlari va energetika sohasidagi yordamni o‘z ichiga olgan alohida “qishki paket” tayyorlashni rejalashtirmoqda.
Stiv Uitkoff va Jared Kushner 5–6-sentabr kunlari Rossiya va Ukraina vakillari bilan uchrashgan. Ular avval Moskvada, keyin Kiyevda muzokaralar o‘tkazgan. Uitkoff Rossiya tomonidan Ukraina mojarosini hal qilish bo‘yicha yangi takliflar bildirilganini ma’lum qilgan.
Amerikalik muzokarachilar, shuningdek, Rossiya, Ukraina va AQSh ishtirokidagi uch tomonlama muzokaralarni qayta tiklash niyatida ekanini bildirgan.
