Belgradda Shavkat Mirziyoyev va Aleksandr Vuchich muzokaralar o‘tkazdi

 

Belgraddagi Serbiya saroyida Shavkat Mirziyoyev va Aleksandr Vuchichning yuzma-yuz hamda rasmiy delegatsiyalar ishtirokidagi muzokaralari bo‘lib o‘tdi.

 

Muzokaralarda O‘zbekiston va Serbiya o‘rtasidagi siyosiy, savdo-iqtisodiy, investitsiyaviy va gumanitar hamkorlikni yanada rivojlantirishning ustuvor yo‘nalishlari muhokama qilindi.

 

Shavkat Mirziyoyev O‘zbekiston Prezidentining Belgradga ilk tashrifi ikki mamlakat o‘rtasidagi munosabatlarda yangi bosqichni boshlab berishini ta’kidladi. Siyosiy muloqot, parlamentlararo aloqalar, ishbilarmonlik va gumanitar almashinuvlar faollashayotgani qayd etildi.

 

Tomonlar savdo-iqtisodiy va investitsiyaviy hamkorlikni kengaytirishga alohida e’tibor qaratdilar. O‘zaro savdo hajmini oshirish, Erkin savdo to‘g‘risidagi bitimni ishlab chiqish, standartlashtirish sohasida hamkorlikni yo‘lga qo‘yish va qo‘shma ko‘rgazmalar tashkil etish muhimligi ta’kidlandi.

 

Transport va logistika, yengil va oziq-ovqat sanoati, qishloq xo‘jaligi, farmatsevtika, tibbiyot hamda raqamli iqtisodiyot yo‘nalishlarida yangi qo‘shma loyihalarni amalga oshirish masalalari ko‘rib chiqildi. Avtomobil qismlari, uskunalar, elektr texnika va elektronika ishlab chiqarishda sanoat kooperatsiyasini rivojlantirish uchun katta salohiyat mavjudligi qayd etildi.

 

Shuningdek, 2026–2028-yillarga mo‘ljallangan sanoatda sheriklikni rivojlantirish bo‘yicha qo‘shma harakatlar rejasi qabul qilindi.

 

Hududlararo aloqalarni mustahkamlash masalasida Samarqand viloyati va Voyevodina, shuningdek, Samarqand va Novi-Sad shaharlari o‘rtasida to‘g‘ridan-to‘g‘ri aloqalar o‘rnatilgani ijobiy baholandi.

 

Gumanitar hamkorlik doirasida ta’lim, madaniyat, sport va turizm sohalaridagi aloqalarni kengaytirish bo‘yicha kelishuvlarga erishildi. Xususan, madaniyat kunlari, kino, teatr va musiqa festivallarini birgalikda o‘tkazish, sport federatsiyalari o‘rtasidagi aloqalarni rivojlantirish rejalashtirilmoqda.

 

Tomonlar tartibli mehnat migratsiyasi masalasini ham muhokama qildilar. Tashrif doirasida Mehnat mobilligi va migratsiyasi to‘g‘risidagi bitim qabul qilingani olqishlandi.

 

Mintaqaviy va xalqaro kun tartibidagi masalalar yuzasidan ham fikr almashildi. Erishilgan kelishuvlarni o‘z vaqtida va sifatli amalga oshirish uchun keng qamrovli “yo‘l xaritasi” qabul qilinishi belgilandi.