Janubiy Koreyada 19 nafar O‘zbekiston fuqarosi qidiruvga berildi

 

Janubiy Koreyada xorijda jinoyat sodir etgani uchun qidiruvda bo‘lgan 110 nafar chet el fuqarosi yashirinib yurgani aniqlangan. Ularning 19 nafari O‘zbekiston fuqarolaridir. Bu haqda Milliy politsiya agentligi ma’lumotlariga tayanib, The Korea Times xabar berdi.

 

Milliy politsiya agentligi ma’lumotlariga ko‘ra, 12-avgust holatida Interpol orqali qidiruv e’lon qilingan xorijiy fuqarolar orasida Xitoy fuqarolari 40 nafar bilan eng katta ulushni tashkil etgan. Keyingi o‘rinlarda O‘zbekiston — 19 nafar, Mo‘g‘uliston — 17 nafar va Vetnam — 13 nafar fuqarosi qayd etilgan.

 

Qidiruvdagi shaxslar bilan bog‘liq jinoyatlar orasida firibgarlik eng ko‘p uchraydi — 47 ta holat. Shuningdek, odam o‘g‘irlash, noqonuniy qamoqda saqlash, bolalar va yoshlarni himoya qilishga oid qonunlarni buzish hamda fohishalik bilan bog‘liq 29 ta holat qayd etilgan.

 

Giyohvand moddalar bilan bog‘liq jinoyatlar 7 ta, o‘g‘irlik, yo‘l harakati qoidalarini buzish, tan jarohati yetkazish va hujum bilan bog‘liq holatlar esa 5 tani tashkil qilgan.

 

Janubiy Koreya politsiyasi Interpol so‘rovi asosida qidiruvdagi shaxslarning ehtimoliy joylashuvi aniqlangan hududlardagi politsiya bo‘linmalariga ularni hibsga olish bo‘yicha ma’lumot yubormoqda.

 

Agentlik bu yil xalqaro hamkorlik doirasidagi xodimlar sonini 22 nafardan 64 nafargacha oshirgan. Shuningdek, xorijiy davlatlarga qaytarilgan shaxslar soni o‘tgan yilgi 13 nafardan 2026-yil avgustiga kelib 24 nafarga yetgan.