Makron Yevropa Ittifoqida 15 yoshgacha bo‘lgan bolalarning ijtimoiy tarmoqlardan foydalanishini taqiqlashni taklif qildi
Uning fikricha, bu chora Yevropa Ittifoqidagi barcha bolalarni onlayn xavflardan himoya qilishga xizmat qiladi.
Fransiya prezidenti Emmanuel Makron Yevropa Komissiyasi prezidenti Ursula fon der Lyayenga Yevropa Ittifoqida 15 yoshgacha bo‘lgan bolalarning ijtimoiy tarmoqlardan foydalanishini cheklovchi umumiy Yevropa qonunchiligini ishlab chiqishni taklif qildi. Bu haqda АФП Fransiya prezidentining Yevropa Komissiyasi rahbariga yuborgan maktubiga tayanib xabar berdi.
Makron 29 avgust kuni yuborgan maktubida 15 yoshgacha bo‘lgan shaxslarning ijtimoiy tarmoqlarga kirishini taqiqlashni yangi umumevropa huquqiy hujjati orqali standartlashtirish zarurligini taʼkidlagan. Uning fikricha, bu chora Yevropa Ittifoqidagi barcha bolalarni onlayn xavflardan himoya qilishga xizmat qiladi.
Fransiya prezidenti, shuningdek, Yevropa qonunchiligida ijtimoiy tarmoqlarning o‘ziga qaramlik xususiyatlarini aniq belgilash va tartibga solish, shuningdek, foydalanish vaqtini cheklash kabi umumiy xavfsizlik standartlarini joriy etish imkoniyatini nazarda tutishni so‘ragan.
Avvalroq Fransiyada 15 yoshgacha bo‘lgan voyaga yetmaganlarning ijtimoiy tarmoqlardan foydalanishini cheklashga qaratilgan qonun loyihasi parlamentning har ikki palatasi tomonidan qo‘llab-quvvatlangan edi. Hujjat platformalardan foydalanuvchilarning yoshini tekshirish mexanizmlarini joriy etishni hamda 15 yoshgacha bo‘lgan bolalarning akkauntlarini yopishni nazarda tutgan.
Shuningdek, 15–18 yoshdagi o‘smirlarning internetdan foydalanish vaqtini cheklash uchun “raqamli komendantlik soati” joriy etish taklif qilingan.
Biroq Fransiya Konstitutsiyaviy kengashi mazkur taqiqni konstitutsiyaga muvofiqligi nuqtai nazaridan rad etgan. Makron endilikda masalani Yevropa Ittifoqi miqyosida umumiy qonunchilik orqali hal qilishni taklif qilmoqda.
