O‘zbekiston Prezidenti sharafiga Serbiyada rasmiy qabul marosimi bo‘lib o‘tdi
Tashrif sharafiga “Kula Belgrad” binosi O‘zbekiston bayrog‘i ranglarida yoritildi.
Shavkat Mirziyoyev rafiqasi bilan birga Belgrad shahrida O‘zbekiston davlat rahbarining Serbiyaga tashrifi munosabati bilan tashkil etilgan rasmiy qabul marosimida ishtirok etdi.
Oliy martabali mehmonlarni Serbiya Prezidenti Aleksandr Vuchich, Birinchi xonim Tamara Vuchich, Xalq majlisi Raisi Ana Brnabich, Bosh vazir Duro Matsut va boshqa rasmiy shaxslar kutib oldi.
Tadbirda O‘zbekiston Prezidentining Serbiyaga ilk rasmiy tashrifi ikki mamlakat o‘rtasidagi munosabatlarni yangi bosqichga olib chiqishi, o‘zaro manfaatli hamkorlikni yanada kengaytirish va mustahkamlash uchun yangi imkoniyatlar ochayotgani ta’kidlandi.
Shuningdek, O‘zbekiston va Serbiya xalqlari o‘rtasidagi do‘stona aloqalar izchil rivojlanib borayotgani qayd etildi.
O‘zbekiston delegatsiyasining tashrifi sharafiga Belgraddagi “Kula Belgrad” osmono‘par binosi O‘zbekiston Respublikasi davlat bayrog‘i ranglarida yoritildi.
