Avgust oyida Prezident Xalq qabulxonalariga 76 mingdan ortiq murojaat kelib tushdi

Prezident Xalq qabulxonasi tizimida 2026-yil avgust oyida 83 019 ta masala bo‘yicha 76 196 ta murojaat ro‘yxatga olindi. Bu haqda tashkilot matbuot xizmati xabar berdi.

 

 

Murojaatlarning 11 114 tasi takroriy, 1 593 tasi esa jamoaviy tusda bo‘lgan. Eng ko‘p murojaatlar bola nafaqasi bo‘yicha — 4 833 ta, aliment masalasida — 4 658 ta hamda gaz ballonlari bilan bog‘liq masalalar bo‘yicha — 2 475 tani tashkil etgan.

 

Shuningdek, huquqbuzarliklarga oid 1 826 ta, bir martalik moddiy yordam bo‘yicha 1 765 ta, surishtiruv va tergov masalalarida 1 709 ta murojaat qayd etilgan.

 

Ish bilan ta’minlash masalasida 1 657 ta, uy-joyni ta’mirlashga moddiy yordam yuzasidan 1 548 ta, ichki yo‘llarni ta’mirlash bo‘yicha 1 528 ta hamda ijro hujjatlariga oid 1 234 ta murojaat kelib tushgan.

 

Tashkilotlar kesimida eng ko‘p murojaat Ijtimoiy himoya milliy agentligiga — 12 097 ta kelib tushgan. Keyingi o‘rinlarni Ichki ishlar vazirligi — 8 258 ta, Majburiy ijro byurosi — 7 966 ta, Energetika vazirligi — 6 551 ta va Bosh prokuratura — 5 498 ta bilan egallagan.

 

Bundan tashqari, Bandlik vazirligiga 4 272 ta, Sog‘liqni saqlash vazirligiga 3 934 ta, Oliy sudga 3 070 ta, Maktabgacha va maktab ta’limi vazirligiga 2 916 ta hamda Markaziy bankka 2 615 ta murojaat yuborilgan.

 

Shoshilinch murojaatlarning 638 tasi elektr ta’minotidagi uzilishlar, 551 tasi ichimlik suvi, 67 tasi esa tez tibbiy yordam xizmati bilan bog‘liq bo‘lgan.

 

Avgust oyida 5 666 ta shaxsiy qabul o‘tkazilishi rejalashtirilgan bo‘lib, amalda 4 666 tasi o‘tkazilgan. O‘tkazilmagan shaxsiy qabullar eng ko‘p Toshkent viloyati — 148 ta, Farg‘ona viloyati — 137 ta va Toshkent shahrida — 134 tani tashkil etgan.

 

Shuningdek, 4 495 ta sayyor qabul rejalashtirilgan, ulardan 4 327 tasi o‘tkazilgan. Sayyor qabul o‘tkazmagan tashkilotlar orasida elektr tarmoqlari korxonalarida 39 ta, obodonlashtirish boshqarmalarida 36 ta va mahallalar bo‘limlarida 31 ta holat qayd etilgan.