Farg‘onada ikki ayolni Moskvaga fohishalik uchun yubormoqchi bo'lgan shaxs ushlandi
U ayollarga aviachiptalarni o‘z hisobidan olib berishini aytib, keyinchalik ularning daromadining yarmini olishni rejalashtirgan.
Farg‘ona shahrida yashovchi, 1999-yilda tug‘ilgan, muqaddam sudlangan fuqaro ikki nafar ayolni Rossiya Federatsiyasining Moskva shahrida fohishalik bilan shug‘ullanish orqali daromad topishga jalb qilmoqchi bo‘lgani aniqlandi. Bu haqda DXX xabar berdi.
Ma’lum qilinishicha, u ayollarga aviachiptalarni o‘z hisobidan olib berishini bildirgan. Shuningdek, Moskva shahriga yetib borganlaridan so‘ng ishlab topadigan daromadlarining yarmini unga berishlarini talab qilgan.
Davlat xavfsizlik xizmati va Ichki ishlar organlari xodimlari hamkorligida o‘tkazilgan tezkor tadbir davomida mazkur shaxs ayollarni Moskva shahriga yuborayotgan vaqtda Farg‘ona xalqaro aeroportida to‘xtatilgan.
Natijada ayollarni noqonuniy faoliyatga jalb etish va xorijga yuborish bilan bog‘liq harakatlarga chek qo‘yilgan.
Holat yuzasidan mazkur shaxsga nisbatan jinoyat ishi qo‘zg‘atilgan. Hozirda tergov harakatlari olib borilmoqda.
