Farg‘onada ikki hamshira pichoqlandi, ulardan biri vafot etdi
Gumonlanuvchi qo‘lga olinib, unga nisbatan jinoyat ishi qo‘zg‘atilgan.
7 sentyabr kuni Farg‘ona viloyati Qo‘shtepa tumanidagi tug‘ruqxonada ikki nafar hamshiraga pichoq bilan hujum qilingan. Hodisa oqibatida hamshiralardan biri olgan tan jarohatlari tufayli vafot etgan.
Maʼlum qilinishicha, hodisani ayol kishi sodir etgan. Dastlabki maʼlumotlarga ko‘ra, u hamshiralarni xonaga qamab, pichoqlagan. Hozircha hujumga nima sabab bo‘lgani va hodisaning boshqa tafsilotlari rasman maʼlum qilinmagan.
Bosh prokuratura matbuot kotibi Hayot Shamsutdinov holatni tasdiqlagan. Uning maʼlum qilishicha, Qo‘shtepa tuman prokuraturasi tomonidan 7 sentyabr kuni mazkur holat yuzasidan Jinoyat kodeksining 97-moddasi, yaʼni qasddan odam o‘ldirish bo‘yicha jinoyat ishi qo‘zg‘atilgan.
Gumonlanuvchi Jinoyat-protsessual kodeksining 221-moddasi tartibida ushlangan.
