Sirdaryoda ikki IIB xodimi jinoyat sodir etib, qamaldi
Ulardan biriga 5 yil 1 oy, ikkinchisiga esa 6 yil 1 oy muddatga ozodlikdan mahrum qilish jazosi tayinlandi.
Sirdaryoda Xovos tumani IIBning ikki sobiq xodimiga pora olish va dalillarni qalbakilashtirish jinoyatlari bo‘yicha sud hukmi chiqarildi. Ular jinoyat ishini ma’muriy huquqbuzarlikka aylantirib berish evaziga fuqarodan 35 million so‘m talab qilgan.
“Zamon” dasturida ma'lum qilinishicha , voqea Xovos tumanidagi fermer xo‘jaligi rahbarining murojaatidan so‘ng aniqlangan. U yer maydonida sodir etilgan noqonuniy holat oqibatida katta miqdorda zarar yetkazilgani yuzasidan IIBga murojaat qilgan.
O‘rganishlar davomida gumondor shaxs fermerga 30–40 million so‘m atrofida zarar yetkazgani aniqlangan. Biroq IIBning ikki xodimi jinoyatni yashirish maqsadida soxta dalillar tayyorlagan.
Ular fermer xo‘jaligi rahbariga gumondor zararni to‘liq qoplay olmasligini, undan 10–12 million so‘m undirib berishlarini bildirgan. Keyinchalik esa gumondorni qo‘rqitib, unga 50 million so‘m zarar yetkazgani va bu mablag‘ni to‘lamasa qamalishini aytishgan.
Gumondor dastlab 24 million so‘m olib kelgan. Xodimlar uning 12 million so‘mini jabrlanuvchiga berib, qolgan holat bo‘yicha jinoyat ishi qo‘zg‘atilmasligi va ish sudda ma’muriy tartibda ko‘rilishini va’da qilgan.
Xodimlar kelishilgan 35 million so‘mdan qolgan 11 million so‘mni olayotgan vaqtda tezkor tadbir davomida qo‘lga olingan.
JIB Sayxunobod tuman sudi hukmi bilan sobiq xodimlar pora olish va dalillarni qalbakilashtirishda aybdor deb topildi. Ulardan biriga 5 yil 1 oy, ikkinchisiga esa 6 yil 1 oy muddatga ozodlikdan mahrum qilish jazosi tayinlandi.
Sud shuningdek, shu kabi jinoyatlarning oldini olish yuzasidan xususiy ajrim chiqarib, uni Sirdaryo viloyati IIBga yubordi.
