Milliy muzey Markaziy Osiyodagi eng yirik madaniy loyihalardan biriga aylanishi shubhasiz — Saida Mirziyoyeva
Muzeyning me’moriy konsepsiyasi nufuzli Pritzker mukofoti sohibi Tadao Ando tomonidan ishlab chiqilgan.
Bugun Prezident Shavkat Mirziyoyev Toshkent shahrida barpo etilayotgan yangi O‘zbekiston Milliy muzeyi qurilish jarayoni bilan tanishdi.
Muzeyning me’moriy konsepsiyasi jahonning eng mashhur arxitektorlaridan biri, nufuzli Pritzker mukofoti sohibi Tadao Ando tomonidan ishlab chiqilgan.
Saida Mirziyoyevaning yozishicha, Tadao Andoning loyihasi bo‘yicha bunyod etilgan muzey va madaniy maskanlar Yaponiya, Yevropa hamda AQSHda yuksak qadrlanadi. Uning me’moriy uslubi chizgilarining soddaligi va aniqligi, makon va yorug‘lik uyg‘unligiga o‘ziga xos yondashuvi bilan dunyoga tanilgan.
“Milliy muzey Markaziy Osiyodagi eng yirik madaniy loyihalardan biriga aylanishi shubhasiz. Bu dargohda ko‘rgazma zallari, kutubxona, restavratsiya laboratoriyalari va ta’lim maydonlari o‘rin oladi”, deya yozdi Saida Mirziyoyeva.
Prezident administratsiyasi rahbarining qayd etishicha, mamlakatdagi ana shunday tarixiy ahamiyatga molik loyihalar ustida dunyo miqyosidagi me’morlar ishlashi juda muhim bo‘lib, ular barpo etgan obyektlar uzoq yillar davomida xalqqa xizmat qiladi, tarix va madaniy merosning ajralmas qismiga aylanadi.
