Olmazorda 400 o‘rinli texnikum va yangi kasb-hunar markazi tashkil etiladi
Shuningdek, xorijda ishlash uchun fuqarolarni maqsadli tayyorlash yo‘lga qo‘yiladi.
Olmazor tumanida mehnat bozori talabi va kadrlar tayyorlash tizimini uyg‘unlashtirish maqsadida yangi ta’lim va kasbga o‘qitish markazlari tashkil etiladi. Bu haqda Prezident Shavkat Mirziyoyev raisligidagi videoselektor yig‘ilishida ma’lum qilindi.
Qayd etilishicha, bugungi kunda tumandagi ish beruvchilarga 4 mingdan ziyod o‘rta maxsus ma’lumotli hamda qariyb 1 ming nafar maxsus ma’lumot talab etilmaydigan yo‘nalishlarda ishchi kuchi kerak.
Shu sababli Olmazor kasbiy ko‘nikmalar markazi negizida axborot texnologiyalari va ilg‘or innovatsiyalar bo‘yicha 400 o‘rinli texnikum tashkil etiladi. Shuningdek, sobiq Toshkent arxitektura-qurilish kolleji binosida zamonaviy kasb-hunar markazi ochiladi. Boshqa mavjud binolardan ham aholini kasbga o‘qitish uchun samarali foydalanish belgilandi.
Xorijda ishlash istagidagi fuqarolarni maqsadli tayyorlash uchun Germaniyaning xususiy o‘quv markazlari bilan hamkorlikda 500 kishiga mo‘ljallangan nemis tili kurslari tashkil etiladi.
Shuningdek, Chexiya va Slovakiya mehnat bozori uchun tibbiyot xodimlarini tayyorlash rejalashtirilgan.
Bundan tashqari, Germaniya, Yaponiya, Koreya va Buyuk Britaniyadan 20 ta yirik rekruting kompaniyasi jalb qilinadi. Fransiya kompaniyalari bilan hamkorlikda esa yiliga 1,5 ming nafar fuqaroni mavsumiy ishlarga joylashtirish bo‘yicha loyihalar amalga oshiriladi.
Yoshlar shaharchasida 42 gektar maydonda IT-park, yuqori texnologiyali sanoat va ta’lim obyektlarini birlashtirgan innovatsion klaster tashkil etish ishlari ham yil yakuniga qadar boshlanadi.
