Toshkentda tadbirkorlar uchun garovsiz kredit limiti 200 mln so‘mgacha oshiriladi
Shuningdek, Miskin va Ibrohim ota mahallalari hududidagi 305 gektarlik sanoat zonasining salohiyati ham ko‘rib chiqildi.
Toshkent shahrida biznes boshlamoqchi bo‘lgan tadbirkorlar uchun garovsiz kredit limiti 100 million so‘mdan 200 million so‘mga oshiriladi. Bu haqda Prezident Shavkat Mirziyoyev raisligidagi videoselektor yig‘ilishida ma’lum qilindi.
Yig‘ilishda mahallalarda kichik biznes va xizmatlar sohasini rivojlantirish, tadbirkorlar uchun yangi imkoniyatlardan samarali foydalanish zarurligi ta’kidlandi.
Shuningdek, ko‘p kvartirali uylarning birinchi qavatlarini savdo va servis faoliyatiga moslashtirish imkoniyatlarini kengaytirish vazifasi belgilandi.
Olmazor tumanida mazkur imkoniyatlardan foydalanib, joriy yilning o‘zida 300 nafar yangi tadbirkorni qo‘llab-quvvatlash va 1 mingta ish o‘rni yaratish rejalashtirilgan. Ushbu tajribani poytaxtning boshqa tumanlariga ham kengaytirib, yil yakunigacha 20 ming nafar aholini daromadli ish bilan ta’minlash vazifasi qo‘yildi.
Yig‘ilishda Miskin va Ibrohim ota mahallalari hududidagi 305 gektarlik sanoat zonasining salohiyati ham ko‘rib chiqildi. Hozir bu yerda 504 ta tadbirkorlik obyekti faoliyat yuritmoqda. Ularning aksariyati bir-ikki qavatli binolarda joylashgani sababli hududning iqtisodiy imkoniyatlaridan to‘liq foydalanilmayotgani qayd etildi.
Sanoat zonasida ish o‘rinlari sonini hozirgi 35 mingdan 100 mingtagacha, eksport hajmini esa 600 million dollargacha yetkazish imkoniyati mavjud.
Buning uchun tadbirkorlarga sanoat ipotekasi, kredit va lizing kabi moliyaviy instrumentlarni taklif etish hamda sanoat hududida yuqori qo‘shilgan qiymat yaratadigan yangi loyihalarni boshlash belgilandi.
