Yo‘lovchilar to‘la avtobus ag‘darildi: Jizzaxdagi hodisa tafsilotlari
Hodisa oqibatida jabrlanganlarga tibbiy yordam ko‘rsatildi, halok bo‘lganlar yo‘q.
Jizzax viloyatining Sharof Rashidov tumanida yuk mashinasi bilan to‘qnashuv oqibatida yo‘lovchilar bo‘lgan avtobus ag‘darildi.
Viloyat YHXB matbuot xizmatining maʼlum qilishicha, hodisa 11 sentyabr kuni soat 08:30 larda M-39 “Toshkent—Termiz” avtomobil yo‘lining Sharof Rashidov tumani hududidan o‘tuvchi 986-kilometrida sodir bo‘lgan.
Qayd etilishicha, “Yutong” rusumli avtobus yo‘lning belgilangan joyidan qayrilayotgan vaqtida qarama-qarshi yo‘nalishda harakatlanayotgan “Shacman” rusumli yuk mashinasi bilan to‘qnashgan. To‘qnashuv oqibatida avtobus ag‘darilgan.
Hodisa oqibatida halok bo‘lganlar qayd etilmagan. Avtobusdagi ayrim yo‘lovchilarga birinchi tibbiy yordam ko‘rsatilgan.
Hodisa yuzasidan belgilangan tartibda surishtiruv ishlari olib borilmoqda.
Eslatib o‘tamiz, avvalroq Toshkent viloyatining Chirchiq shahrida “Howo” rusumli yuk mashinasining yarim tirkamasi xonadon devoriga borib urilgani haqida xabar berilgan edi.
